گیبرون (شِنہوا) بوٹسوانا میں چین کے سفیر فان یونگ نے کہا ہے کہ چین دونوں ممالک کے سربراہان مملکت کے درمیان طے پانے والے اہم اتفاق رائے پر عملدرآمد کے لئے بوٹسوانا کے ساتھ مل کر کام کرنے کو تیار ہے۔
بوٹسوانا کے صدر دوما گیڈیون بوکو کے 12 سے 17 اکتوبر تک چین کے پہلے سرکاری دورے کے حوالے سے ایک پریس بریفنگ سے خطاب کرتے ہوئے فان یونگ نے اس دورے کو تاریخی اور انتہائی کامیاب قرار دیا۔ انہوں نے کہا کہ چین اور بوٹسوانا کے سفارتی تعلقات کی 51 ویں سالگرہ کے موقع پر یہ دورہ دوطرفہ تعلقات میں ایک اور اہم تاریخی سنگ میل ہے۔
انہوں نے دورے کے اہم نتائج اور اس کی اہمیت کا ذکر کرتے ہوئے کہا کہ دونوں ممالک کے تعلقات کو جامع تزویراتی تعاون پر مبنی شراکت داری کی سطح تک بڑھانا اور مشترکہ بیان جاری کرنا ایک نئی پیش رفت، نئی بلندیوں، نئے اصولوں، نئے مواقع اور نئی توانائی کی علامت ہے۔
فان یونگ نے کہا کہ سیاسی سطح پر باہمی اعتماد کو نئی بلندیوں تک لے جانے کے لئے دونوں ممالک کی سیاسی جماعتوں کے درمیان قریبی اور اعلیٰ سطح کے تبادلے جاری رکھنا، حکومتی امور چلانے کے تجربات کا تبادلہ بڑھانا اور تجارت و سرمایہ کاری، کان کنی، سائنس و ٹیکنالوجی، ڈیجیٹل معیشت، ماحول دوست ترقی، طبی و صحت کی سہولیات، زراعت، جنگلات، آبی وسائل کے انتظام، انسانی وسائل کی ترقی اور عوامی روابط سمیت مختلف شعبوں میں عملی تعاون کو فروغ دینا ضروری ہے۔
چینی سفیر نے کہا کہ بوٹسوانا معدنی وسائل سے مالا مال ہے اور کان کنی کے شعبے میں تعاون عملی اشتراک کی اولین ترجیحات میں شامل ہے۔ انہوں نے مزید کہا کہ چین بوٹسوانا میں طبی ٹیمیں بھیجنے کا سلسلہ جاری رکھے گا اور آنے والے مہینوں میں موتیے کے مریضوں کے علاج کے لئے "روشن سفر” پروگرام بھی جاری رکھے گا۔
فان یونگ کے مطابق دونوں ممالک نے ثقافت، سیاحت، کھیل، نوجوانوں، خواتین کو بااختیار بنانے، میڈیا اور تھنک ٹینکس سمیت دیگر شعبوں میں تعاون بڑھانے پر بھی اتفاق کیا ہے تاکہ ایک دوسرے کے بارے میں بہتر سمجھ بوجھ پیدا ہو اور عوام کے درمیان روابط مزید مضبوط ہوں۔
