لندن (لارڈ میڈیا): برطانیہ نے سعودی عرب کے دفاع کے لیے رائل ایئر فورس کے ٹائفون لڑاکا طیارے، ایک ٹرانسپورٹ طیارہ اور فوجی مشیر بھیجنے کا اعلان کیا ہے۔ برطانوی حکومت کا یہ اقدام سعودی فضائی حدود، شہروں اور اہم تنصیبات کو حوثی باغیوں کے میزائلوں اور ڈرون حملوں سے محفوظ رکھنے کی کوشش ہے۔
برطانوی وزارت دفاع نے تصدیق کی ہے کہ ٹائفون لڑاکا طیارے سعودی عرب کے دفاع کے لیے فضائی مشن انجام دیں گے۔ ان طیاروں کا کردار دفاعی نوعیت کا ہوگا اور وہ حوثی باغیوں کے خلاف جارحانہ فضائی حملوں میں حصہ نہیں لیں گے۔
برطانوی وزیر دفاع ویس اسٹریٹنگ نے سعودی عرب پر حوثیوں کے حملوں کی مذمت کرتے ہوئے کہا کہ ریاض کے ہوائی اڈے کو نشانہ بنانا ظاہر کرتا ہے کہ حوثی خطے میں کشیدگی بڑھانے کے لیے کس حد تک جا سکتے ہیں۔ انہوں نے کہا کہ سعودی فضائی حدود کو محفوظ رکھنے کے لیے ٹائفون طیاروں کی دفاعی پروازوں کی منظوری دی گئی ہے۔
برطانوی وزارت دفاع کے مطابق اضافی فوجی تعاون میں اٹلس اے 400 ایم ٹرانسپورٹ طیارہ اور فوجی مشیر بھی شامل ہوں گے۔ یہ اقدام خلیج میں بڑھتی کشیدگی کے پیش نظر سعودی عرب کے دفاع میں اہم قرار دیا گیا ہے۔
برطانوی حکومت کے مطابق سعودی عرب اور یمن اس کے دیرینہ شراکت دار ہیں، اور وہ سعودی عرب کے دفاع، اہم تجارتی راستوں اور توانائی کی فراہمی کے تحفظ کے ساتھ یمن کے تنازع کے سفارتی حل کی حمایت جاری رکھے گی۔
