**راجن پور (لارڈ میڈیا)، 21 اکتوبر:** پنجاب کے ضلع راجن پور میں انڈس ہائی وے پر مسافر بس الٹنے سے 9 افراد جاں بحق جبکہ خواتین اور بچوں سمیت 36 افراد زخمی ہوگئے۔
مقامی میڈیا اور ریسکیو ذرائع کے مطابق حادثہ بنگلہ ہدایت کے قریب پیش آیا، جہاں کراچی سے ڈیرہ غازی خان جانے والی مسافر بس مبینہ طور پر سڑک کے ڈیوائیڈر سے ٹکرا کر الٹ گئی۔
حادثے کی اطلاع ملتے ہی ریسکیو ٹیمیں موقع پر پہنچ گئیں اور تباہ شدہ بس میں پھنسے مسافروں کو نکالنے کے لیے امدادی کارروائیاں شروع کردیں۔
ابتدائی اطلاعات کے مطابق حادثے میں 9 مسافر جان کی بازی ہار گئے جبکہ 36 افراد زخمی ہوئے، جن میں خواتین اور بچے بھی شامل ہیں۔ زخمیوں کو طبی امداد کے لیے قریبی اسپتالوں میں منتقل کردیا گیا، جبکہ جاں بحق افراد کی لاشیں بھی جائے حادثہ سے منتقل کردی گئیں۔
حکام کی جانب سے تاحال جاں بحق اور زخمی ہونے والے تمام افراد کی شناخت ظاہر نہیں کی گئی۔ حادثے کی وجوہات بھی فوری طور پر معلوم نہیں ہوسکیں، جبکہ متعلقہ حکام کی جانب سے واقعے کی تحقیقات کے بعد مزید تفصیلات سامنے آنے کا امکان ہے۔
