بیجنگ (شِنہوا) چینی صدر شی جن پھنگ نے منگل کو مرکزی ادارہ برائے سوشلزم کے 70 ویں یوم تاسیس کے موقع پر مبارکباد کا خط بھیجاہے۔
شی جن پھنگ، جو کمیونسٹ پارٹی آف چائنہ (سی پی سی) کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین بھی ہیں، نے اپنے خط میں ادارے کی خدمات کو سراہا۔ انہوں نے کہا کہ ادارے نے گزشتہ 70 برسوں کے دوران بڑی تعداد میں ایسے غیر سی پی سی نمائندوں کی تربیت کی ہے جو سی پی سی کے نظریات سے اتفاق کرتے ہیں اور مشترکہ اہداف کے حصول کے لئے مل کر کام کرتے ہیں۔ اس کے علاوہ ادارے نے محب وطن متحدہ محاذ کو مستحکم کرنے اور ترقی دینے میں بھی اہم کردار ادا کیا ہے۔
انہوں نے ادارے پر زور دیا کہ وہ سیاسی تربیت کو مزید مضبوط بنانے، وسیع تر سیاسی اتفاق رائے پیدا کرنے، تدریس و تحقیق کے معیار کو بہتر بنانے اور اپنی انتظامی صلاحیت بڑھانے کا سلسلہ جاری رکھے۔
شی جن پھنگ نے کہا کہ ادارہ متحدہ محاذ کے لئے باصلاحیت افراد کی تربیت، نظریاتی تحقیق اور اصولوں و پالیسیوں کے فروغ میں مزید موثر کردار ادا کرے تاکہ کمیونسٹ پارٹی آف چائنہ اور ملک کے مجموعی امور میں بہتر انداز سے معاونت کی جا سکے۔
