اسلام آباد (لارڈ میڈیا) پاکستان کی آئی ٹی اور ٹیکنالوجی برآمدات میں مالی سال 2027 کی پہلی سہ ماہی میں نمایاں اضافہ دیکھنے میں آیا ہے، جو ایک ارب 25 کروڑ ڈالر تک پہنچ گئیں۔ ستمبر میں آئی ٹی برآمدات 43 کروڑ 50 لاکھ ڈالر تک پہنچیں، جو ماہانہ بنیاد پر 10 فیصد اور سالانہ بنیاد پر 18 فیصد اضافے کی عکاسی کرتی ہیں۔
مشیر وزارت خزانہ خرم شہزاد نے بتایا کہ ستمبر میں آئی ٹی برآمدات کی مالیت دسمبر 2025 کی بلند ترین سطح سے صرف 20 لاکھ ڈالر کم رہی۔ دسمبر 2025 میں یہ برآمدات 43 کروڑ 70 لاکھ ڈالر تک پہنچ گئی تھیں۔
خرم شہزاد نے اس پیشرفت کو پاکستان کی آئی ٹی خدمات کی عالمی منڈی میں طلب اور برآمدی سرگرمیوں میں بہتری کا عکاس قرار دیا ہے۔ انہوں نے مالی سال 2027 کی پہلی سہ ماہی کے اعداد و شمار جاری کرتے ہوئے بتایا کہ اس عرصے میں آئی ٹی برآمدات مجموعی طور پر ایک ارب 25 کروڑ ڈالر تک پہنچ گئیں۔
آئی ٹی برآمدات میں اضافے کو ملک کے لیے زرمبادلہ کمانے کے حوالے سے اہم پیش رفت قرار دیا جا رہا ہے۔ اس شعبے میں سافٹ ویئر، ڈیجیٹل خدمات اور دیگر ٹیکنالوجی برآمدات شامل ہیں، جو پاکستان کی عالمی منڈی میں موجودگی کو مضبوط بنانے میں کردار ادا کرتی ہیں۔
اعداد و شمار کے مطابق ستمبر میں ماہانہ اور سالانہ دونوں بنیادوں پر برآمدات میں اضافہ ریکارڈ کیا گیا، جس سے امید کی جا رہی ہے کہ ملک کے برآمدی شعبے کو تقویت ملے گی اور زرمبادلہ کے حصول میں مدد ملے گی۔
