جنیوا (شِنہوا) چین کے شہر شنگھائی، برطانیہ کے شہر لیورپول اور بیلجیم کے شہر شارلروا کو تخلیقی ملکیت کی عالمی تنظیم (ڈبلیو آئی پی او) نے پیر کے روز پہلے ” سٹی آف انوویشن” ایوارڈ کا فاتح قرار دیا ہے۔
2026 میں پہلی بار متعارف کرایا گیا یہ ایوارڈ ڈبلیو آئی پی او کے تمام 194 رکن ممالک کے شہروں کے لئے کھلا ہے۔ یہ ایوارڈ ایسے وژنری شہروں کو دیا جاتا ہے جو آئندہ سال کے دوران جدت اور تخلیقی صلاحیتوں کے فروغ کے لئے غیر معمولی عزم کا مظاہرہ کرتے ہیں۔ تینوں فاتح شہروں کا انتخاب 15 حتمی امیدوار شہروں میں سے کیا گیا۔
ڈبلیو آئی پی او کے مطابق شنگھائی کا وژن سائنس، ٹیکنالوجی اور تخلیقی ملکیت (آئی پی) کے عالمی مرکز کے طور پر اپنی حیثیت کو مزید مستحکم بنانا ہے جبکہ جدت اور تخلیقی صلاحیتوں کے فروغ کے لئے وسیع تر ثقافت کو بھی پروان چڑھانا ہے۔ شہر کے وعدوں میں تخلیقی ملکیت سے متعلق تعلیم اور خدمات کو وسعت دینا، جدت کے لئے بنیادی سہولت اور اعدادوشمار تک رسائی فراہم کرنا، ثقافتی اور تخلیقی صنعتوں کی معاونت کرنا اور تحقیق، صنعت، کاروباری افراد اور سرمایہ کاروں کے درمیان روابط مضبوط بنانا شامل ہے۔
شنگھائی میونسپل پیپلز گورنمنٹ کے ڈپٹی سیکرٹری جنرل ژو یامنگ نے کہا کہ یہ ایوارڈ شنگھائی میں جدت کے فروغ اور تخلیقی ملکیت کے ایک فعال نظام کی تشکیل کے لئے اس کی کوششوں پر ڈبلیو آئی پی او کے بھرپور اعتماد کا اظہار ہے۔
انہوں نے کہا کہ یہ عالمی برادری کی جانب سے جدت کے لئے چین کے باہمی مفادات، وسعت اور مشترکہ کامیابی کے عزم کی توثیق بھی ہے۔
فاتحین کا انتخاب ثقافتی اور تخلیقی شعبوں، شہری منصوبہ بندی، کمیونٹی کی ترقی اور جدت پر مبنی معاشی نمو کے ممتاز ماہرین پر مشتمل ایک آزاد بین الاقوامی جیوری نے کیا۔
بین الاقوامی جیوری پینل کی رکن اور کنگسٹن کری ایٹو کی شریک بانی و ایگزیکٹو ڈائریکٹر آندریا ڈیمپسٹر چھونگ نے کہا کہ شنگھائی کی درخواست بہت متاثر کن تھی۔ اس کی وجہ نہ صرف شہر میں تحقیق و ترقی کا مضبوط نظام تھا بلکہ اس کے بڑے عزائم اور پختہ وعدے بھی تھے۔
انہوں نے کہا کہ یہ شہر کے مستقبل کی سمت تبدیل کرنے میں فیصلہ کن کردار ادا کر سکتا ہے اور یہی ان وجوہات میں سے ایک ہے جن کی بنا پر شنگھائی کا انتخاب کیا گیا۔
