ڈبلن (لارڈ میڈیا) آئرلینڈ اور آسٹریا کے درمیان نیشنز لیگ کا میچ فلسطین کے حق میں مظاہروں کے باعث دو مرتبہ مختصر طور پر روک دیا گیا۔
میچ کے 19ویں منٹ میں تماشائیوں نے فلسطینی پرچم کے اسٹیکرز لگی ٹینس بالز میدان میں پھینکیں، جس کے بعد کھلاڑی چند منٹ کے لیے میدان سے باہر چلے گئے۔
35ویں منٹ میں ایک شخص فلسطینی پرچم لہراتا ہوا میدان میں داخل ہوگیا، جس سے کھیل ایک بار پھر مختصر طور پر متاثر ہوا۔
احتجاج کے باعث متاثر ہونے والا میچ 2-2 سے برابر رہا۔ آئرلینڈ کے کوچ نے کہا کہ وہ ایسی صورتحال سے خوش نہیں ہوتے، تاہم احتجاج کی وجوہات کو سمجھتے اور احترام کرتے ہیں۔
یہ واقعات آئرلینڈ اور اسرائیل کے حالیہ میچ کے بعد سامنے آئے ہیں، جس پر غزہ جنگ کے تناظر میں بائیکاٹ کا مطالبہ کیا گیا تھا۔ آئرلینڈ نے وہ میچ 0-3 سے جیتا تھا۔
دریں اثنا، تقریباً 200 مظاہرین نے ڈبلن اسٹیڈیم کے باہر ‘اسٹاپ دی گیم’ مہم کے تحت احتجاج کیا اور اسرائیل کے خلاف کھیلوں کے بائیکاٹ کا مطالبہ کیا۔
