وینتیان (شِنہوا) لاؤس کے بوٹن سٹیشن سے پیر کے روز مقامی وقت کے مطابق صبح 8 بجے سی 95 ٹرین کی کامیاب روانگی کے ساتھ چین۔لاؤس ریلوے کے لاؤس والے حصے پر بوتن اور لاؤس کے دارالحکومت وینتیان کے درمیان انٹر سٹی ٹرین سروس کا باقاعدہ آغاز ہوگیا۔
چین۔لاؤس ریلوے کمپنی لمیٹڈ (ایل سی آر سی)، جو ریلوے کے لاؤس والے حصے کی آپریٹر ہے، کے مطابق نئی شروع کی گئی سی 95/سی 96 انٹر سٹی ٹرین سروس بوٹن اور وینتیان کے درمیان تیز رفتار اور سہل سفری رابطہ فراہم کرے گی۔
ٹرین سی 95 صبح 8 بجے بوٹن سٹیشن سے روانہ ہو کر صبح 11 بج کر 47 منٹ پر وینتیان سٹیشن پہنچے گی، جبکہ ٹرین سی 96 دوپہر 2 بج کر 5 منٹ پر وینتیان سٹیشن سے روانہ ہو کر شام 6 بج کر 32 منٹ پر بوٹن سٹیشن واپس پہنچے گی۔
یہ سروس 6 سٹیشنوں بوتن، ناتوئی، موانگ شے، لوانگ پرابانگ، وانگ وینگ اور وینتیان پر رکے گی۔ نئے شیڈول کے تحت شمالی صوبوں کے رہائشی دارالحکومت وینتیان میں روزمرہ آمدورفت، کاروباری امور اور اہل خانہ سے ملاقات کے لئے سفر کرکے اسی روز اپنے گھروں کو واپس جا سکیں گے۔
ایل سی آر سی کے مطابق اس انٹر سٹی سروس کے آغاز سے لاؤس کے حصے میں مسافر ٹرانسپورٹ کے نیٹ ورک میں مزید بہتری آئے گی، لاؤس کے عوام کے لئے سفری سہولیات میں اضافہ ہوگا، ریلوے کے راستے میں ثقافتی سیاحت کی صنعتوں کی ترقی کو فروغ ملے گا اور چین۔لاؤس اقتصادی راہداری کی تعمیر اور بیلٹ اینڈ روڈ انیشی ایٹو کی مشترکہ ترقی کے لئے زیادہ مضبوط ٹرانسپورٹ سہولت فراہم ہوگی۔
