نیویارک (شِنہوا) امریکی صدر ڈونلڈ ٹرمپ نے اس میڈیا رپورٹ کی تردید کی ہے جس میں کہا گیا تھا کہ ان کی انتظامیہ نے جوہری معاملے میں رعایتوں کے بدلے ایران کو پابندیوں میں نرمی اور منجمد اثاثوں تک رسائی کی پیشکش کی تھی۔
ٹرمپ نے سوشل میڈیا پر لکھا کہ ایکسیوس نے ابھی ایک خبر جاری کی ہے کہ ‘ٹرمپ’ نے ایران کو پابندیوں میں نرمی اور منجمد اثاثوں کی پیشکش کی ہے۔ یہ غلط ہے۔ میں نے انہیں کچھ بھی پیش نہیں کیا! ایکسیوس کی یہ خبر بھی دیگر کئی خبروں کی طرح جھوٹی ہے۔
ٹرمپ نے ایکسیوس سے مطالبہ کیا کہ وہ یہ خبر”فوری طور پر” واپس لے۔
ایکسیوس کی یہ خبر اس وقت سامنے آئی جب ٹرمپ نے ہفتے کے اختتام پر ایران کی جانب سے پیش کی گئی جنگ بندی کی تجویز مسترد کر دی تھی۔
مقامی میڈیا کے مطابق ایران کی مجوزہ امن تجویز میں مطالبہ کیا گیا ہے کہ آبنائے ہرمز میں ایرانی بندرگاہوں کی امریکی ناکہ بندی معطل کی جائے، اس کے بدلے ایران آبنائے ہرمز کے باقی حصے کو دوبارہ کھولنے اور اپنے جوہری پروگرام پر مذاکرات بحال کرنے پر آمادہ ہوگا۔
ٹرمپ کی جانب سے امن تجویز مسترد کئے جانے کے ردعمل میں ایرانی وزیر خارجہ عباس عراقچی نے اتوار کو کہا کہ یہ صدر ٹرمپ پر منحصر ہے کہ وہ سفارت کاری اور جنگ جاری رکھنے میں سے کس کا انتخاب کرتے ہیں۔
عراقچی نے کہا کہ ہم جنگ دوبارہ شروع ہونے کے لئے پوری طرح تیار ہیں۔ ہم کسی بھی نئی جارحیت کے مقابلے میں ڈٹے رہیں گے خواہ یہ ایک ایسی جنگ ہی کیوں نہ ہو جو قیامت خیز شکل اختیار کر لے۔
