کوئٹہ (لارڈ میڈیا) کراچی سے کوئٹہ جانے والی ڈسٹرکٹ ویسٹ کی فٹبال ٹیم کو کوئٹہ میں جاری چیف منسٹر گولڈ کپ فٹبال ٹورنامنٹ میں شرکت کے لیے جاتے ہوئے مستونگ اور سریاب کے درمیان ڈاکوؤں نے لوٹ لیا۔ مسلح رہزنوں نے بس میں سوار تمام مسافروں سے لاکھوں روپے کے موبائل فونز اور نقدی چھین لی۔
ذوالفقار علی بھٹو، ڈسٹرکٹ ویسٹ فٹبال ٹیم کے منیجر، نے کہا کہ بس کو روک کر ڈاکوؤں نے مسافروں کو یرغمال بنایا اور ایک گھنٹے تک لوٹ مار جاری رکھی۔ انہوں نے بتایا کہ ڈاکوؤں نے کھلاڑیوں پر تشدد بھی کیا اور قیمتی اشیاء چھین لیں۔
واقعے کے بعد جب بس رینجرز چوکی پہنچی تو رینجرز اہلکاروں نے کہا کہ یہ ان کی حدود میں نہیں آتا۔ ذوالفقار بھٹو نے بتایا کہ کوئٹہ پہنچنے پر ٹورنامنٹ آرگنائزرز نے کھلاڑیوں کو ڈیلی الاؤنس فراہم کیا۔ انہوں نے بلوچستان کی وزیر کھیل کو نقصان کے ازالے کی درخواست کی ہے۔
سندھ فٹبال ایسوسی ایشن کے صدر اعظم نے کہا کہ بلوچستان کی صورتحال خطرناک ہے، اس لیے سندھ کی ٹیم نے شرکت نہیں کی۔ انہوں نے مزید کہا کہ پنجاب اور کے پی کے کی ٹیموں نے بھی ٹورنامنٹ میں شرکت نہیں کی۔
