بغداد (لارڈ میڈیا) عراق نے سعودی عرب کی آئل پائپ لائن پر ڈرون حملے کے بعد بند کی گئی ایران کے ساتھ تین سرحدی گزرگاہیں دوبارہ کھولنے کا اعلان کیا ہے۔ عراقی حکام کے مطابق میسان صوبے میں ڈرون لانچ کیے جانے کے شواہد ملنے کے بعد گزرگاہیں عارضی طور پر بند کی گئی تھیں۔
عراق نے شلامچہ، الشیب اور مندلی کی سرحدی گزرگاہوں پر سکیورٹی اور انٹیلی جنس کارروائیوں کو بہتر بنانے کے لیے انتظامی اقدامات مکمل کر لیے ہیں۔ شلامچہ اور الشیب سے مسافروں کی آمدورفت اتوار کو بحال کردی گئی جبکہ تجارتی سرگرمیاں مرحلہ وار بحال ہوں گی۔
سعودی عرب نے دعویٰ کیا ہے کہ عراق سے لانچ کیے گئے ڈرونز نے اس کی تیل پائپ لائن کو نشانہ بنایا تاہم کسی گروپ نے ذمہ داری قبول نہیں کی۔ ایران نواز عراقی مسلح گروہوں نے حملے میں ملوث ہونے کی تردید کی ہے۔
یہ پیش رفت خطے میں ایران، عراق اور خلیجی ممالک کے درمیان کشیدگی کے دوران سامنے آئی ہے، جو سعودی تیل تنصیبات پر حملے کے بعد مزید بڑھ گئی ہے۔
