چین کا ایبولا سے نمٹنے میں افریقی ممالک کے ساتھ تعاون جاری رکھنے کا اعلان

بیجنگ (شِنہوا) چین کی وزارت خارجہ کے ترجمان نے کہا ہے کہ ایبولا کی وبا اب بھی پھیل رہی ہے، اس لئے چین افریقی ممالک کی معاونت جاری رکھے گا اور وبا کے جلد خاتمے کے لئے ضروری تعاون فراہم کرے گا۔

چینی وزارت خارجہ کے ترجمان لین جیان نے یہ بات اس سوال کے جواب میں کہی کہ چینی حکومت کی جانب سے بھیجی گئی طبی ماہرین کی تیسری ٹیم یکم اگست کو جمہوریہ کانگو کے دارالحکومت کنشاسا پہنچ گئی ہے۔

لین جیان نے کہا کہ افریقہ میں ایبولا کی وبا پھیلنے کے بعد چین نے صورتحال کو انتہائی سنجیدگی سے لیا اور جمہوریہ کانگو سمیت متعدد افریقی ممالک میں طبی ماہرین کی ٹیمیں روانہ کیں، جن کی کوششوں کو بھرپور سراہا گیا ہے۔

انہوں نے کہا کہ طبی ماہرین کی تیسری ٹیم وبائی امراض، صحت کی قرنطینہ، طبی علاج اور امراض پیدا کرنے والے عوامل کی لیبارٹری ٹیسٹنگ کے ماہرین پر مشتمل ہے۔ سابقہ ٹیموں کے کام کی بنیاد پر یہ ٹیم وبا کی روک تھام اور کنٹرول کی ضروریات کے مطابق جمہوریہ کانگو اور بین الاقوامی تنظیموں کے ساتھ تبادلہ خیال اور رابطہ کاری کو مزید مضبوط بنائے گی۔

لین جیان نے کہا کہ "چونکہ ایبولا کی وبا اب بھی پھیل رہی ہے، اس لئے چین براعظم افریقہ میں اپنے طبی ماہرین کی خدمات جاری رکھے گا، افریقی ممالک کی معاونت کرے گا اور وبا کے جلد خاتمے کے لئے درکار ہر ممکن تعاون فراہم کرے گا۔”