تہران (لارڈ میڈیا): ایران کے پاسداران انقلاب نے دعویٰ کیا ہے کہ ان کی ایرو اسپیس فورس نے آبنائے ہرمز کی فضائی حدود میں ایک امریکی MQ-9 ریپر ڈرون کو اپنے جدید فضائی دفاعی نظام کے ذریعے نشانہ بنایا ہے۔ ایرانی خبر رساں ادارے فارس کے مطابق پاسداران انقلاب نے کہا ہے کہ ڈرون کا بروقت سراغ لگا کر اسے فائرنگ کر کے روک دیا گیا۔
بیان میں دعویٰ کیا گیا کہ یہ کارروائی ایران کی فضائی نگرانی اور دفاعی صلاحیتوں کا حصہ تھی، تاہم یہ نہیں بتایا گیا کہ ڈرون مکمل طور پر تباہ ہوا یا صرف نشانہ بنایا گیا۔ مزید تکنیکی تفصیلات یا تصاویر جاری نہیں کی گئیں جبکہ امریکی فوج یا امریکی سینٹرل کمان نے بھی اس دعوے پر فوری طور پر کوئی باضابطہ ردعمل نہیں دیا۔
دفاعی ماہرین کے مطابق MQ-9 Reaper ایک جدید بغیر پائلٹ کا امریکی ڈرون ہے جو نگرانی، جاسوسی اور بعض صورتوں میں حملہ آور مشنز کے لیے استعمال کیا جاتا ہے۔
آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں حالیہ ہفتوں کے دوران فوجی سرگرمیوں اور کشیدگی میں اضافہ دیکھا گیا ہے۔ اس وجہ سے اس علاقے میں پیش آنے والے ہر واقعے پر عالمی سطح پر گہری نظر رکھی جا رہی ہے۔ فارس کی رپورٹ میں کیے گئے دعوؤں کی آزاد ذرائع سے تصدیق نہیں ہو سکی جبکہ امریکی حکام کی جانب سے بھی اس بارے میں تاحال کوئی باضابطہ مؤقف سامنے نہیں آیا۔
