کراچی (لارڈ میڈیا): ویسٹ انڈیز کے خلاف دوسرے ٹیسٹ میچ میں پاکستانی ٹیم کی سلیکشن نے کرکٹ حلقوں کو حیرت میں ڈال دیا ہے کیونکہ محمد عباس کو پلئینگ الیون سے باہر کر دیا گیا۔
پہلے ٹیسٹ میں شکست کے بعد ٹیم میں چار تبدیلیاں کی گئیں، تاہم محمد عباس کی عدم شمولیت سب سے زیادہ زیر بحث رہی۔ محمد عباس نے پہلے میچ میں مجموعی طور پر آٹھ وکٹیں حاصل کیں، جس میں ایک اننگز میں پانچ وکٹوں کی کارکردگی شامل تھی۔
کپتان بابر اعظم نے کہا ہے کہ محمد عباس مکمل فٹ ہیں اور انہیں آرام دیا گیا ہے تاکہ پچ کی صورتحال کے مطابق بہترین ٹیم میدان میں اتاری جائے۔ پاکستانی ٹیم نے محمد عباس کی جگہ ساجد خان کو اضافی اسپنر کے طور پر شامل کیا جبکہ نوجوان فاسٹ بولر عبید شاہ کو ٹیسٹ ڈیبیو کا موقع دیا گیا۔
دسمبر 2024 میں قومی ٹیم میں واپسی کے بعد محمد عباس نے پانچ ٹیسٹ میچوں میں 28 وکٹیں حاصل کی ہیں، جو انہیں پاکستان کا کامیاب ترین فاسٹ بولر بناتی ہیں۔ اگلی ٹیسٹ سیریز انگلینڈ میں شیڈول ہے جہاں محمد عباس کا کاؤنٹی کرکٹ کا تجربہ ٹیم کے لیے اہم ثابت ہو سکتا ہے۔
