عمان (لارڈ میڈیا): اردن کی مسلح افواج نے دعویٰ کیا ہے کہ ان کی فضائی دفاعی فورسز نے ایران سے داغے گئے پانچ میزائل کامیابی سے تباہ کر دیے، جو اردن کی حدود کو نشانہ بنا رہے تھے۔ فوج کے بیان کے مطابق جمعرات کی علی الصبح فضائی دفاعی نظام نے ان میزائلوں کا بروقت سراغ لگا کر فضا میں ہی ناکام بنا دیا۔
فوجی ترجمان نے کہا کہ تمام میزائل کامیابی سے تباہ کر دیے گئے، جس سے کسی قسم کا جانی یا مالی نقصان نہیں ہوا۔ اردن کی مسلح افواج ملک کی فضائی حدود، شہریوں اور قومی سلامتی کے تحفظ کے لیے ہر وقت تیار ہیں اور کسی بھی ممکنہ خطرے کا مؤثر جواب دینے کی صلاحیت رکھتی ہیں۔
اردنی حکام نے میزائل حملوں کی تکنیکی تفصیلات یا ان کے ممکنہ اہداف کے بارے میں مزید معلومات فراہم نہیں کیں۔ یہ واقعہ ایسے وقت میں پیش آیا ہے جب مشرق وسطیٰ میں ایران اور امریکا کے درمیان کشیدگی بڑھ رہی ہے اور مختلف ممالک اپنی دفاعی تیاریوں کو مضبوط بنا رہے ہیں۔
دفاعی تجزیہ کاروں کے مطابق خطے میں میزائل حملوں اور جوابی کارروائیوں کا سلسلہ جاری رہا تو اس کے اثرات پورے مشرق وسطیٰ کی سلامتی اور استحکام پر پڑ سکتے ہیں۔
