اوسلو (لارڈ میڈیا): ناروے اور مانچسٹر سٹی کے اسٹار فٹبالر ارلنگ ہالینڈ نے اپنی 26ویں سالگرہ دوستوں اور گرل فرینڈ کے ہمراہ ایک یاٹ پر منائی۔ ہالینڈ نے اس موقع پر مزیدار کھانوں، موسیقی اور گالف جیسی سرگرمیوں کا لطف اٹھایا اور وائکنگ ہیٹ پہنے نظر آئے۔ بعد ازاں، وہ ایک ڈے کلب پہنچے جہاں انہیں ڈی جے بوتھ پر موسیقی سے لطف اندوز ہوتے دیکھا گیا۔
سالگرہ کے موقع پر ہالینڈ نے انسٹاگرام پر پیغام دیا کہ وہ سب کی محبت کے شکر گزار ہیں اور ان کی زندگی ہمیشہ کے لیے بدل گئی ہے، جسے وہ پسند کر رہے ہیں۔ ان کی گرل فرینڈ ازابیل جوہانسن نے بھی سوشل میڈیا پر انہیں مبارکباد دی جس پر ہالینڈ نے مختصر جواب ‘نائس’ دیا، جو مداحوں کی توجہ کا مرکز بن گیا۔
واضح رہے کہ ارلنگ ہالینڈ اور ازابیل جوہانسن کئی برسوں سے ساتھ ہیں اور 2024 میں ان کے ہاں پہلے بیٹے کی پیدائش ہوئی تھی۔
ارلنگ ہالینڈ نے 2026 فیفا ورلڈ کپ میں ناروے کی نمائندگی کرتے ہوئے اپنی ٹیم کو کوارٹر فائنل تک پہنچانے میں اہم کردار ادا کیا تھا۔ اب ان کی توجہ مانچسٹر سٹی کے آئندہ سیزن کی تیاریوں پر مرکوز ہے۔
