سڈنی (شِنہوا)آسٹریلیا کے معروف ماہر معاشیات نے کہا ہے کہ 2026 کی پہلی ششماہی میں چین کی اقتصادی کارکردگی انتہائی مثبت رہی حالانکہ یہ مدت دنیا کی کئی معیشتوں کے لئے نہایت مشکل ثابت ہوئی۔
یونیورسٹی آف سڈنی بزنس سکول میں چینی کاروبار اور انتظامی امور کے پروفیسر ہانس ہینڈرشکے نے شِنہوا کو دیئے گئے ایک انٹرویو میں کہا کہ چین نے سال کی پہلی ششماہی میں مستحکم معیشت اور برآمدات میں اضافے کی بدولت بہت اچھے نتائج حاصل کئے ہیں۔
چین کے قومی ادارہ شماریات کے مطابق 2026 کی پہلی ششماہی میں ملک کی مجموعی قومی پیداوار (جی ڈی پی) میں گزشتہ سال کے مقابلے میں 4.7 فیصد اضافہ ریکارڈ کیا گیا۔
ہینڈرشکے نے کہا کہ یہ مثبت نتائج چین کی محتاط معاشی منصوبہ بندی کا ثبوت ہیں جس کی بدولت اقتصادی ترقی کی شرح مقررہ ہدف کے دائرے میں رہی۔
انہوں نے چین کی برآمدات میں مضبوط اضافے کو سراہتے ہوئے کہا کہ ان کی نمو بہت مضبوط رہی ہے۔
چین کی جنرل ایڈمنسٹریشن آف کسٹمز کے اعداد وشمار کے مطابق 2026 کی پہلی ششماہی میں چین کی غیر ملکی تجارت گزشتہ سال کے مقابلے میں 16.9 فیصد بڑھ کر 254.7 کھرب یوآن (تقریباً 37.5 کھرب امریکی ڈالر) تک پہنچ گئی۔
مجموعی طور پر برآمدات گزشتہ سال کے مقابلے میں 13.4 فیصد اضافے کے ساتھ 147.3 کھرب یوآن رہیں، جو مسلسل گیارہ سہ ماہیوں سے بڑھ رہی ہیں جبکہ درآمدات 22.1 فیصد اضافے کے ساتھ 107.4 کھرب یوآن تک پہنچ گئیں جو برآمدات کی شرح نمو سے 8.7 فیصد زیادہ ہیں۔ اس سے تجارت میں زیادہ توازن پیدا کرنے میں مدد ملی۔
ہینڈرشکے نے کہا کہ چین کی برآمدات خاص طور پر ہائی ٹیکنالوجی، جدید پیداوار، مصنوعی ذہانت سے متعلق صنعتوں اور ماحول دوست توانائی جیسے مستقبل کے اہم شعبوں میں نمایاں طور پر بڑھی ہیں۔
ہینڈرشکے کے مطابق مضبوط اقتصادی کارکردگی اور مستحکم ترسیلی سلسلے کی بدولت چین عالمی اقتصادی ترقی کا ایک اہم محرک بن چکا ہے جبکہ ٹیکنالوجی اور تجارت کے شعبوں میں بھی ایک قابل اعتماد شراکت دار کے طور پر ابھر رہا ہے۔
انہوں نے کہا کہ مثال کے طور پر قابل تجدید توانائی کے شعبے میں چین کا کردار مستقبل میں عالمی معیشت کے لئے انتہائی اہم ہوگا۔
انہوں نے مزید کہا کہ ٹیکنالوجی اور تجارت کے علاوہ چین بین الاقوامی مالیاتی تعاون اور ادارہ جاتی ترقی میں بھی تیزی سے اہم کردار ادا کر رہا ہے۔
