بیجنگ (شِنہوا) چین کی وزارت قومی دفاع کے ترجمان نے جمعہ کے روز کہا ہے کہ چین اور روس کے درمیان فوجی تعاون دونوں ممالک کی خودمختاری اور سلامتی کے تحفظ کے ساتھ ساتھ بین الاقوامی اور علاقائی امن و استحکام کو برقرار رکھنے میں اہم کردار ادا کرتا ہے۔
چین کی وزارت قومی دفاع کے ترجمان جیانگ بن نے یہ بات حالیہ چین۔روس مشترکہ بحری مشق اور مشترکہ گشت سے متعلق میڈیا کے ایک سوال کے جواب میں کہی۔
جیانگ نے تصدیق کی کہ "جوائنٹ سی-2026” مشترکہ بحری مشق میں شریک افواج نے تمام مقررہ اہداف کامیابی سے مکمل کر لئے ہیں اور دونوں ممالک اب مشترکہ بحری گشت کے مرحلے میں داخل ہو چکے ہیں۔
انہوں نے میڈیا کو بتایا کہ یہ سرگرمیاں چین اور روس کی افواج کے درمیان سالانہ تعاون کے منصوبے کا حصہ ہیں، جن کا مقصد سمندری سلامتی کو درپیش خطرات سے مشترکہ طور پر نمٹنے کی صلاحیت کو مضبوط بنانا ہے۔ انہوں نے مزید کہا کہ ان سرگرمیوں کا موجودہ بین الاقوامی یا علاقائی صورتحال سے کوئی تعلق نہیں۔
جیانگ نے اس بات کا اعادہ کیا کہ چین۔روس فوجی تعاون دھڑے بندی سے پاک، محاذ آرائی سے گریز اور کسی تیسرے فریق کو نشانہ نہ بنانے کے اصولوں پر مبنی ہے۔
انہوں نے کہا کہ "ہم امید کرتے ہیں کہ متعلقہ فریق چین اور روس کے فوجی تعاون کو معروضی اور دانش مندانہ انداز میں دیکھیں گے اور بے بنیاد قیاس آرائیوں اور بلاجواز تنقید سے گریز کریں گے۔”
