ایران پر تازہ امریکی حملوں میں 14 افراد جاں بحق، 78 زخمی

تہران (شِنہوا) ایرانی حکام نے بتایا ہے کہ ایران پر گزشتہ شب امریکی حملوں میں 14 افراد جاں بحق اور 78 دیگر زخمی ہو گئے ہیں، جبکہ ایک پل اور ریلوے لائن کو بھی نقصان پہنچا ہے۔
نیم سرکاری خبر رساں ادارے ‘فارس’ نے جمعرات کے روز بتایا کہ صوبہ خوزستان کے سکیورٹی اور قانون کے نفاذ کے امور کے نائب گورنر ولی اللہ حیاتی نے بتایا کہ جاں بحق والوں میں سے 3افراد جنوب مغربی شہر اہواز کے قریب مارے گئے۔
‘فارس’ کے مطابق شمال مشرقی شہر مشہد سے دارالحکومت تہران جانے والی ریلوے لائن کو بھی ان حملوں میں نشانہ بنایا گیا، جس کے باعث اس روٹ پر ٹرین سروس معطل ہو گئی۔ تکنیکی اور آپریشنل ٹیموں کو جائے وقوعہ پر روانہ کر دیا گیا ہے جنہوں نے متاثرہ حصے کو دوبارہ تعمیر کر لیا ہے۔
ایجنسی کا مزید کہنا تھا کہ ان حملوں میں صوبہ گلستان کی شمالی عقالہ کاؤنٹی میں ایک پل کو بھی نشانہ بنایا گیا۔
امریکی سنٹرل کمانڈ نے کہا ہے کہ اس کی افواج نے آبنائے ہرمز میں تجارتی جہاز رانی پر حملے کرنے کی ایرانی صلاحیت کو کمزور کرنے کے لئے حملوں کا ایک اور دور مکمل کیا ہے۔
کمانڈ کے مطابق امریکی افواج نے ایران کی ساحلی پٹی کے ساتھ تقریباً 90 ایرانی فوجی اہداف کو نشانہ بنایا، جن میں ایئر ڈیفنس سسٹم، ساحلی نگرانی کے آلات، میزائل اور ڈرون ذخیرہ کرنے کے مقامات، بحری صلاحیتیں اور فوجی لاجسٹک انفراسٹرکچر شامل ہیں۔