بیجنگ (شِنہوا) چین کے اعلیٰ سیاسی مشیر وانگ ہوننگ نے پالیسی تحقیق کو مزید موثر بنانے اور ایک مضبوط داخلی منڈی کی تعمیر کے لئے قابل عمل تجاویز پیش کرنے پر زور دیا ہے۔
وانگ ہوننگ نے غیر کمیونسٹ سیاسی جماعتوں کی مرکزی کمیٹیوں اور غیر جماعتی شخصیات کے نمائندوں کی جانب سے پیش کردہ تحقیقی نتائج پر منعقدہ ایک مشاورتی اجلاس سے خطاب کرتے ہوئے اجلاس میں پیش کی گئی تحقیقی اور پالیسی سفارشات کا حوالہ دیا۔ انہوں نے کہا کہ ایک مضبوط داخلی منڈی نئے ترقیاتی نمونے کو فروغ دینے اور اعلیٰ معیار کی ترقی کے حصول کے لئے تزویراتی بنیاد فراہم کرتی ہے۔ ان کے مطابق یہ جامع اصلاحات کو گہرا کرنے اور اعلیٰ معیار کی سوشلسٹ مارکیٹ معیشت کی تعمیر کے اہم ہدف کی تکمیل میں بھی کلیدی کردار ادا کرتی ہے۔
وانگ نے زور دیا کہ 15ویں 5 سالہ منصوبے (2026 تا 2030) کے اہداف کو مدنظر رکھتے ہوئے مضبوط داخلی منڈی کی تعمیر سے متعلق اہم امور پر گہری تحقیق کی جائے تاکہ پارٹی اور حکومت کو مزید ٹھوس، موثر اور قابل عمل پالیسی تجاویز فراہم کی جا سکیں۔
اجلاس کی صدارت لی گان جے نے کی جو کمیونسٹ پارٹی آف چائنہ کی مرکزی کمیٹی کے سیاسی دفتر کے رکن اور کمیونسٹ پارٹی آف چائنہ کے یونائٹیڈ فرنٹ ورک ڈیپارٹمنٹ کے سربراہ ہیں۔ اجلاس میں متعدد غیر کمیونسٹ سیاسی جماعتوں اور غیر جماعتی شخصیات کے نمائندوں نے اپنی تحقیقی رپورٹیں پیش کیں اور پالیسی تجاویز بھی دیں۔
