یورپ (لارڈ میڈیا): یورپ اس وقت تاریخ کی شدید ترین گرمی کی لہر کا سامنا کر رہا ہے، جس نے کئی ممالک میں درجہ حرارت کے ریکارڈ توڑ دیے ہیں۔ عالمی ادارۂ صحت کے ڈائریکٹر جنرل ٹیڈروس ایڈہانوم گیبریئس نے کہا ہے کہ 21 جون سے اب تک یورپ میں شدید گرمی سے منسلک 1300 سے زائد اضافی اموات ریکارڈ کی جا چکی ہیں۔ انہوں نے مزید کہا کہ یورپ میں شدید گرمی کی لہر سے بڑی تعداد میں لوگ متاثر ہو رہے ہیں اور بجلی کا نظام بھی دباؤ کا شکار ہے۔
فرانس کی وزارتِ صحت کے مطابق گزشتہ بدھ سے ملک میں تقریباً ایک ہزار اضافی اموات ریکارڈ کی گئی ہیں۔ موسم کے ماہرین کے مطابق یہ گرمی کی لہر یورپ کی تاریخ کی بدترین ہیٹ ویو ہے، جس نے بجلی کی پیداوار، ٹرانسپورٹ اور صحت کے نظام کو متاثر کیا ہے۔
سائنس دانوں کے مطابق انسان کی سرگرمیوں کی وجہ سے پیدا ہونے والی موسمیاتی تبدیلی کے بغیر ایسی شدید گرمی تقریباً ناممکن تھی۔ آسٹریا، جمہوریہ چیک، جرمنی اور پولینڈ میں درجہ حرارت نے نئے ریکارڈ قائم کیے ہیں۔
یورپی ممالک میں شدید گرمی سے دریاؤں کی حالت بھی متاثر ہوئی ہے۔ ہنگری کے پاکس ایٹمی بجلی گھر نے دریائے ڈینیوب کے پانی کا درجہ حرارت بڑھنے کے باعث اپنی پیداوار کم کر دی ہے۔ اٹلی میں دریائے پو کا بہاؤ کم ہونے سے زراعت اور دلدلی علاقوں کو خطرات لاحق ہو گئے ہیں۔
