جارجیا (لارڈ میڈیا): جارجیا کی پارلیمنٹ میں وزیر اعظم یراکلی کوباخیدزے کی حکومت کی سالانہ کارکردگی رپورٹ پیش کیے جانے کے بعد شدید ہنگامہ آرائی ہوئی۔ حکمران جماعت اور اپوزیشن کے ارکان کے درمیان تلخ کلامی ہاتھا پائی میں بدل گئی۔
ہنگامے کا آغاز اس وقت ہوا جب اپوزیشن رکن جورجی شراشیدزے نے آذربائیجان کے صدر الہام علیئیف کے جارجیا کے دورے کا حوالہ دیتے ہوئے وزیر اعظم پر تنقید کی۔ انہوں نے کہا کہ صدر کے دورے کے دوران وزیر اعظم کی حیثیت اور کردار واضح ہوگئے تھے۔
پارلیمانی کارروائی کے دوران اپوزیشن جماعت فور جارجیا اور حکمران جماعت جارجین ڈریم کے ارکان کے درمیان سخت جملوں کا تبادلہ ہوا۔ ارکان اپنی نشستوں سے اٹھ کر ایک دوسرے کی جانب بڑھے اور ایوان میں دھکم پیل شروع ہوگئی۔
عینی شاہدین کے مطابق ایوان کا ماحول انتہائی کشیدہ ہوگیا، جہاں ارکان گتھم گتھا ہوگئے۔ ہنگامہ آرائی کے باعث پارلیمانی کارروائی متاثر ہوئی۔
یہ واقعہ ایسے وقت میں پیش آیا جب وزیر اعظم حکومت کی کارکردگی پر ارکان کے سوالات کے جوابات دے رہے تھے۔ اس واقعے نے ملک کی سیاسی فضا میں جاری کشیدگی کو نمایاں کر دیا۔
