شین زین (شِنہوا) چین کے جنوبی صوبے گوانگ ڈونگ کے شہر شین زین میں 22ویں چین (شین زین) بین الاقوامی ثقافتی صنعتی میلے کا آغاز ہو گیا۔
پانچ روزہ میلے میں ثقافتی صنعتوں کی ترقی پر توجہ مرکوز کی گئی ہے جس میں آن لائن اور آف لائن دونوں طرح کے 6 ہزار 312 نمائش کنندگان شریک ہیں اور ایک لاکھ 20 ہزار سے زائد ثقافتی مصنوعات نمائش کے لئے پیش کی گئی ہیں۔
اس سال پہلی بار اپیک معیشتوں کے لئے ایک خصوصی نمائشی علاقہ قائم کیا گیا ہے جہاں ایشیا بحرالکاہل خطے کی ثقافتی سیاحت میں حاصل کردہ کامیابیوں کو اجاگر کیا جا رہا ہے۔ اس حصے میں خطے کی خصوصی مصنوعات، غیر مادی ثقافتی ورثے سے متاثر تخلیقی مصنوعات اور علاقائی کھانے بھی پیش کئے جا رہے ہیں۔
شین زین اس سال نومبر میں اپیک اقتصادی رہنماؤں کے 33ویں اجلاس کی میزبانی بھی کرے گا۔
اس کے علاوہ ایک نیا نمائشی علاقہ سرحد پار ای کامرس کے لئے مختص کیا گیا ہے جہاں درجنوں متعلقہ ادارے شریک ہیں۔ اس کا مقصد ثقافتی صنعت میں بین الاقوامی تجارت کو فروغ دینا اور ثقافتی مصنوعات کو عالمی منڈیوں تک پہنچانے کے لئے راستے فراہم کرنا ہے۔
شین زین عالمی نمائش و کنونشن مرکز میں مجموعی طور پر آٹھ نمائشی ہال قائم کئے گئے ہیں جن میں گوانگ ڈونگ-ہانگ کانگ-مکاؤ عظیم بے ایریا میں ثقافتی صنعت کی جدت پر مبنی ہال بھی شامل ہے۔
2004 میں قائم ہونے والا یہ میلہ اب چین کی ایک اہم ثقافتی تقریب اور چینی ثقافت کو عالمی سطح پر متعارف کرانے کے لئے ایک اہم پلیٹ فارم بن چکا ہے۔
