قاہرہ (شِنہوا) گلوبل ساؤتھ میڈیا اینڈ تھنک ٹینک فورم کے تحت منعقدہ ایک اہم تقریب چین-عرب پارٹنرشپ کانفرنس بدھ کے روز یہاں ایک اعلامیہ کے اجرا کے ساتھ اختتام پذیر ہوگئی جس کا مقصد چین اور عرب ممالک کے درمیان میڈیا کے شعبے میں تعاون کو فروغ دینا ہے۔
دستاویز کے مطابق شریک فریقین نے چین اور عرب میڈیا تنظیموں اور تھنک ٹینکس کے درمیان تعاون کو مضبوط بنانے، امن کے تحفظ میں میڈیا کے کردار کو فروغ دینے اور مختلف شعبوں میں عملی تعاون کو وسعت دینے پر اتفاق کیا۔
اس دستاویز میں ایک مشترکہ میڈیا بیانیہ تیار کرنے، میڈیا ٹیکنالوجی اور ڈیجیٹل تبدیلی میں تعاون بڑھانے پر بھی زور دیا گیا ہے۔ اس کے علاوہ تعاون کے متعدد ٹھوس اقدامات بھی تجویز کئے گئے۔
یہ تقریب گلوبل ساؤتھ میڈیا اینڈ تھنک ٹینک نیٹ ورک فار کمیونیکیشن اینڈ کوآپریشن کی بنیاد پر منعقد کی گئی جس کا آغاز شِنہوا نیوز ایجنسی نے 2024 میں کیا تھا۔ یہ نیٹ ورک تیزی سے پھیلا ہے جس میں دنیا بھر کے 95 ممالک اور خطوں سے ایک ہزار سے زائد میڈیا ہاؤسز، تھنک ٹینکس، سرکاری ایجنسیاں اور بین الاقوامی تنظیمیں شامل ہو چکی ہیں۔
شِنہوا نیوز ایجنسی اور عرب لیگ کے اشتراک سے منعقدہ اس کانفرنس کا مقصد علمی تبادلے کے عمل کو گہرا کرنا، ترقی پر اتفاقِ رائے پیدا کرنا اور مشترکہ مستقبل کے حامل ایک اعلیٰ سطح کے چین-عرب معاشرے کی تعمیر میں حصہ ڈالنا تھا۔
تقریب میں چین اور عرب دنیا کی تقریباً 110 میڈیا تنظیموں، تھنک ٹینکس، سرکاری، کاروباری اور بین الاقوامی اداروں کے تقریباً 250 نمائندوں نے شرکت کی۔
