نوم پنہ (شِنہوا) کمبوڈیا کے مشہور انگ کور آثار قدیمہ پارک نے 2026 کے پہلے 4 ماہ کے دوران مجموعی طور پر 23 ہزار 965 چینی سیاحوں کو اپنی طرف راغب کیا۔
بدھ کو ریاستی ملکیت والے انگ کور انٹرپرائزز کی رپورٹ میں بتایا گیا ہے کہ رواں سال جنوری سے اپریل کے عرصے کے دوران یونیسکو کی عالمی ثقافتی ورثہ کی فہرست میں شامل اس مقام پر آنے والے بین الاقوامی سیاحوں میں چین چوتھا بڑا ذریعہ رہا۔ اس فہرست میں پہلے 3 نمبروں پر بالترتیب امریکہ، برطانیہ اور فرانس رہے۔
رپورٹ میں مزید بتایا گیا ہے کہ صرف اپریل کے مہینے میں 5 ہزار 820 چینی سیاحوں نے اس قدیم پارک کی سیر کی۔
کمبوڈیا کے شمال مغربی صوبے سیم ریپ میں 401 مربع کلومیٹر پر پھیلا انگ کور آثار قدیمہ پارک، جو ملک کا سب سے مقبول سیاحتی مقام ہے، 91 قدیم مندروں پر مشتمل ہے جو نویں سے تیرہویں صدی کے درمیان تعمیر کئے گئے تھے۔
کمبوڈیا یونیورسٹی آف ٹیکنالوجی اینڈ سائنس کے چائنہ-آسیان سٹڈیز سنٹر کے ڈپٹی ڈائریکٹر تھونگ مینگ ڈیوڈ نے اس اعتماد کا اظہار کیا ہے کہ چینی شہریوں کے لئے کمبوڈیا کی آزمائشی ویزا فری پالیسی، جو 15 جون سے 15 اکتوبر 2026 تک نافذ ہوگی، مزید چینی سیاحوں کو خاص طور پر انگ کور پارک کی جانب راغب کرنے میں مدد دے گی۔
