اسلام آباد: وفاقی وزیر انسانی حقوق سینیٹر اعظم نذیر تارڑ نے صنفی مساوات ،خواتین کو بااختیار بنانے کے عزم کا اعادہ کرتے ہوئے کہا ہے کہ منصفانہ ،ترقی یافتہ معاشرے کی تشکیل خواتین کو مساوی حقوق کی فراہمی سے ہی ممکن ہے۔
عالمی یوم خواتین پر جاری بیان میں اعظم نذیر تارڑ نے کہا ہے کہ پاکستان خواتین کے حقوق کے تحفظ کیلئے اپنے آئینی و عالمی وعدوں کی پاسداری کیلئے پرعزم ہے، حکومت صنفی بنیاد پر تشدد، کام کی جگہ پر ہراسانی اور کم عمری کی شادی جیسے سنگین مسائل کے خلاف قوانین کو مزید موثر بنانے کیساتھ ادارہ جاتی معاونت کیلئے ہیلپ لائنز، تحفظ مراکز اور شکایات ازالہ سیلز کو مزید فعال کر رہی ہے۔
انہوں نے کہا کہ وزارتِ انسانی حقوق شراکت دار اداروں کے تعاون سے کلیدی پالیسی اقدامات، آگاہی مہمات اور تربیتی پروگرامز کے ذریعے خواتین کے حقوق کے تحفظ ،وقار و خودمختاری کے فروغ کیلئے سرگرمِ عمل ہے۔
انہوں نے کہا کہ ایک منصفانہ و ترقی یافتہ معاشرہ اسی وقت ممکن ہے جب خواتین کو مساوی حقوق و مواقع میسر ہوں، ان کے حقوق کا موثر تحفظ یقینی بنایا جائے اور وہ ہر طرح کے امتیازی سلوک و تشدد سے محفوظ رہیں۔انہوں نے کہا کہ ہم خواتین کی معاشرتی، معاشی و قومی ترقی میں بے مثال خدمات کو خراجِ تحسین پیش کرتے ہیں اور اس عزم کا اعادہ کرتے ہیں کہ ایک ایسا معاشرہ تشکیل دیا جائے جہاں ہر خاتون بلا خوف و امتیاز اپنے حقوق سے مستفید ہو سکے۔انہوں نے کہا کہ آئیے ہم سب مل کر مساوات، انصاف اور ترقی کے یکساں مواقع کی فراہمی کیلئے مشترکہ جدوجہد کریں۔
