ریاض (لارڈ میڈیا) سعودی دارالحکومت ریاض میں ایک صوفہ فیکٹری میں آگ لگنے کے باعث 16 بنگلادیشی مزدور جاں بحق ہو گئے۔ بنگلادیشی وزارت خارجہ نے اتوار کو تصدیق کی کہ اس حادثے میں کوئی شخص زخمی نہیں ہوا، تاہم تمام متاثرہ افراد جاں بحق ہوگئے۔
بنگلادیشی سفارتخانے کے مطابق آگ ریاض کے الصفا ضلع کے صنعتی علاقے میں صوفہ فیکٹری میں لگی۔ بنگلادیش کے وزیر برائے اوورسیز ویلفیئر عریف الحق چوہدری نے کہا کہ سعودی عرب میں بنگلادیشی سفارتخانے کے ذریعے مقامی حکام سے مسلسل رابطہ رکھا جا رہا ہے۔
انہوں نے مزید کہا کہ حکام کو ہدایت کی گئی ہے کہ جاں بحق ہونے والے تارکین وطن کی میتیں جلد از جلد بنگلادیش منتقل کی جائیں اور ان کے خاندانوں کو ضروری حکومتی امداد اور معاوضہ فراہم کیا جائے۔
سعودی عرب کے سول ڈیفنس ادارے نے بھی ریاض میں غیر لائسنس یافتہ فرنیچر سازی کی جگہ پر لگنے والی آگ کی تصدیق کی، تاہم ہلاکتوں کی تفصیلات فراہم نہیں کیں۔
سعودی میڈیا کی رپورٹس کے مطابق 30 لاکھ سے زائد بنگلادیشی شہری سعودی عرب میں مقیم ہیں، جو کہ خلیجی ممالک کی طرح افرادی قوت کے لیے بڑا ذریعہ ہیں۔
