ابو ظہبی (لارڈ میڈیا): متحدہ عرب امارات نے بیرون ملک سے آنے والے خاندانوں کے لیے 18 سال سے کم عمر بچوں کے ٹورسٹ ویزا کی سرکاری فیس محدود مدت کے لیے معاف کر دی ہے۔ یہ سہولت 15 جولائی سے 15 ستمبر تک دستیاب ہوگی، جس کا مقصد سیاحت کو فروغ دینا اور سفری اخراجات میں کمی لانا ہے۔
یہ سہولت ان بچوں کے لیے ہے جو والدین کے ساتھ یو اے ای کا سفر کر رہے ہوں۔ بچوں کی ویزا درخواست والدین کی ٹورسٹ ویزا درخواست کے ساتھ جمع کرانا ضروری ہے۔ ٹریول ایجنٹس کے مطابق یہ رعایت صرف بیرون ملک سے آنے والے سیاح خاندانوں کے لیے ہے۔
حکومت بچوں کی ویزا درخواست کی فیس معاف کرتی ہے، تاہم والدین کو ٹریول انشورنس اور سروس چارجز ادا کرنا ہوں گے۔ مختلف ایجنسیوں کے مطابق اضافی اخراجات تقریباً 120 درہم فی بچہ ہو سکتے ہیں۔
وائز فاکس ٹورازم کے سینئر منیجر کے مطابق، عام حالات میں بچوں کے ٹورسٹ ویزا کی درخواست پر تقریباً 250 سے 350 درہم خرچ آتا ہے، لیکن اس رعایت کے دوران یہ فیس معاف ہوگی۔
یہ رعایت 30 روزہ اور 60 روزہ دونوں ٹورسٹ ویزا پر لاگو ہوگی، البتہ والدین اور بچوں کی درخواستیں ایک ساتھ جمع کرانا لازمی ہے۔ 18 سال یا اس سے زیادہ عمر کے افراد پر عام ویزا فیس لاگو ہوگی۔
