بیجنگ (شِنہوا) چین نے اعلیٰ معیار کے کھلے پن کی پالیسی کو مزید وسعت دیتے ہوئے اب 63 ممالک کو زیرو ٹیرف سہولت فراہم کر دی ہے۔
چین کی جنرل ایڈمنسٹریشن آف کسٹمز (جی اے سی) کی سربراہ سن می جون نے ایک پریس کانفرنس سے خطاب کرتے ہوئے کہا کہ کسٹمز حکام 2026 سے 2030 کے دوران متنوع عالمی منڈیوں کو مزید وسعت دینے کی کوششیں جاری رکھیں گے۔
انہوں نے بتایا کہ مئی میں چین نے ان تمام 53 افریقی ممالک سے درآمدات پر توسیع شدہ زیرو ٹیرف سہولت کا نفاذ شروع کیا تھا، جن کے ساتھ اس کے سفارتی تعلقات قائم ہیں۔
سن کے مطابق اس پالیسی پر موثر عملدرآمد کے لئے جنرل ایڈمنسٹریشن آف کسٹمز نے متعدد اقدامات متعارف کرائے ہیں، جن میں خطرات کی بنیاد پر کسٹمز انتظام، مارکیٹ تک رسائی کے مربوط طریقہ کار اور زرعی و غذائی مصنوعات کے لئے گرین چینلز کی توسیع شامل ہیں۔ ان اقدامات کے نتیجے میں 2026 کی پہلی ششماہی کے دوران افریقہ کے ساتھ چین کی تجارت میں گزشتہ سال کی نسبت 19.6 فیصد اضافہ ریکارڈ کیا گیا۔
انہوں نے مزید کہا کہ کسٹمز حکام کھلے پن سے متعلق اقدامات اور اعلیٰ معیار کے تجارتی معاہدوں پر عملدرآمد آئندہ بھی آگے بڑھائیں گے، جبکہ کسٹمز طریقہ کار، قرنطینہ کے نظام اور اصل قواعد میں ہم آہنگی کو بھی مزید بہتر بنایا جائے گا۔
