لندن (لارڈ میڈیا) برطانیہ کے وزیراعظم اینڈی برنہم نے اقتدار سنبھالنے کے بعد پہلے عوامی ریلیف پیکیج کے تحت گھریلو بجلی کے بلوں پر عائد ویلیو ایڈڈ ٹیکس (VAT) ختم کرنے کا اعلان کیا ہے۔ حکومت کی جانب سے جاری بیان کے مطابق یکم اکتوبر 2026 سے گھریلو بجلی کے بلوں پر 5 فیصد VAT ختم کر دیا جائے گا۔ اس اقدام سے صارفین کو فوری ریلیف ملے گا۔
وزیراعظم اینڈی برنہم نے کہا کہ عوام کو بڑھتی ہوئی مہنگائی سے نجات دلانا ان کی حکومت کی اولین ترجیح ہے۔ انہوں نے بجلی کے بلوں پر ٹیکس ختم کرنے کا مقصد معیشت میں اعتماد بحال کرنا اور عوام کو امید دلانا قرار دیا۔
برطانیہ کے وزیر خزانہ جان ہیلی نے کہا کہ اس اقدام کے اخراجات ڈیجیٹل آئی ڈی پروگرام منسوخ کرکے پورے کیے جائیں گے، جس پر آئندہ تین برسوں میں 1.8 ارب پاؤنڈ خرچ ہونا تھا۔ حکومت کے مطابق اس فیصلے کے نتیجے میں اوسط صارف کے سالانہ بجلی کے بل میں 45 پاؤنڈ تک کمی متوقع ہے۔
حکومت نے کہا کہ تمام توانائی فراہم کرنے والی کمپنیاں VAT میں کمی کا مکمل فائدہ صارفین تک منتقل کریں گی۔ گھریلو نرخوں پر بجلی استعمال کرنے والے چھوٹے کاروبار اور خیراتی ادارے بھی اس ریلیف سے مستفید ہوں گے۔
روس یوکرین جنگ اور ایران میں جاری کشیدگی کے باعث توانائی کی عالمی قیمتوں میں اضافے کے پیش نظر حکومت نے عوام کو فوری ریلیف فراہم کرنے کو اولین ترجیح قرار دیا ہے۔ شمالی آئرلینڈ کے لیے بھی مساوی مالی معاونت فراہم کی جائے گی۔
