واشنگٹن: امریکہ نے خطے میں استحکام کیلئے پاکستان کے کردار کو سراہتے ہوئے کہا ہے کہ پاکستان کا ایران کیساتھ مکالمے میں ثالث کا کردار قابل تعریف ہے، پاک امریکہ انسداد دہشت گردی مذاکرات اگلے ماہ اسلام آباد میں ہوں گے۔
پاک امریکہ وزرائے خارجہ کی ملاقات پر امریکی محکمہ خارجہ کی جانب سے جاری بیان میں کہا گیا ہے کہ سینیٹر اسحاق ڈار سے ملاقات میں سیکرٹری خارجہ مارکو روبیو نے پاکستان کے مثبت کردار کو سراہا ہے۔
انہوں نے کہا کہ پاکستان کا ایران کیساتھ مکالمے میں ثالث کا کردار قابل تعریف ہے، پاکستان نے خطے میں استحکام کیلئے کردار ادا کیا ہے۔
بیان میں کہا گیا ہے کہ دہشتگردی کے خاتمے کیلئے دوطرفہ تعاون بڑھانے ، داعش خراسان کے خلاف مشترکہ حکمت عملی پر بھی تبادلہ خیال کیا گیا ہے ۔امریکی محکمہ خارجہ نے کہا کہ ملاقات میں تجارتی تعلقات بڑھانے کی اہمیت پر زور دیا گیا، معدنیات اور مائننگ سیکٹر میں تعاون کے امکانات پر بات چیت کی گئی۔
بیان میں کہا گیا ہے کہ دونوں ممالک کے درمیان انسدادِ دہشتگردی مذاکرات اگلے ماہ اگست میں اسلام آباد میں ہوں گے ۔
