جوہانسبرگ (لارڈ میڈیا): انٹرنیشنل کرکٹ کونسل نے 2027 میں جنوبی افریقہ، زمبابوے اور نمیبیا میں ہونے والے ون ڈے ورلڈ کپ کے لیے نئے فارمیٹ کا اعلان کیا ہے۔ اس نئے نظام کے تحت بھارت اور پاکستان کے درمیان ایک اضافی میچ ہونے کا امکان پیدا ہوا ہے، جو کرکٹ کی دنیا کا بڑا مقابلہ سمجھا جاتا ہے۔ نئے فارمیٹ میں 14 ٹیمیں شامل ہوں گی، جن میں سے کم درجہ بندی کی حامل تین ٹیمیں ابتدائی مرحلے میں کھیلیں گی۔ ان میں سے ایک ٹیم اگلے مرحلے کے لیے کوالیفائی کرے گی، جبکہ مرکزی مرحلے میں 12 ٹیمیں دو گروپس میں تقسیم ہوں گی۔ ہر گروپ میں 6 ٹیمیں ہوں گی۔
آئی سی سی کے مطابق نئے فارمیٹ کا مقصد ٹورنامنٹ کو زیادہ دلچسپ اور مسابقتی بنانا ہے۔ گروپ اور سپر سیون مرحلے میں زیادہ میچز ہوں گے، جس سے بھارت اور پاکستان کے درمیان اضافی مقابلہ کا امکان بڑھ گیا ہے۔ دونوں ممالک کے درمیان سیاسی کشیدگی کے باعث دوطرفہ سیریز نہیں ہوتی، اور دونوں ٹیمیں صرف آئی سی سی کے عالمی ٹورنامنٹس میں ہی آمنے سامنے آتی ہیں۔
آئی سی سی نے 2028 ٹی ٹوئنٹی ورلڈ کپ کے فارمیٹ میں بھی تبدیلی کی منظوری دی ہے، جس میں 20 ٹیمیں شامل ہوں گی۔ گروپ مرحلے سے 10 ٹیمیں اگلے مرحلے میں پہنچیں گی، جبکہ بہترین کارکردگی دکھانے والی دو ٹیمیں سیمی فائنل میں جگہ بنائیں گی۔
آئی سی سی نے ویسٹ انڈیز کرکٹ بورڈ کو 1 کروڑ 28 لاکھ 20 ہزار امریکی ڈالر قرض کی منظوری بھی دی ہے تاکہ مالی ضروریات پوری کی جا سکیں۔ ویسٹ انڈیز مختلف جزائر کے کھلاڑیوں پر مشتمل علاقائی ٹیم ہے، جو مالی مشکلات کا سامنا کرتی ہے۔
