واشنگٹن (لارڈ میڈیا) امریکا کی آزادی کے 250 سال مکمل ہونے کی مرکزی تقریب طوفانی موسم کے باوجود منعقد ہوئی، جس میں امریکی صدر ڈونلڈ ٹرمپ نے شرکت کی اور انتخابی مہم جیسا خطاب کیا۔ تقریب میں خراب موسم کے باعث تاخیر ہوئی، تاہم صدر ٹرمپ رات 11 بج کر 15 منٹ پر اسٹیج پر پہنچے اور کہا کہ اگر ضرورت پڑتی تو وہ مزید انتظار کرنے کے لیے بھی تیار تھے۔
موسمی حالات کے باعث حکام نے شروع میں واشنگٹن مونومنٹ کے قریب موجود کھلے میدان کو خالی کرایا اور شرکاء کو قریبی عمارتوں میں پناہ لینے کی ہدایت دی گئی۔ بعد میں موسم بہتر ہونے پر لوگوں کو دوبارہ تقریب میں آنے کی اجازت دی گئی۔
تقریب میں شرکت کرنے والوں کو سخت سیکیورٹی انتظامات اور شدید گرمی کا سامنا کرنا پڑا، جب کہ درجہ حرارت 102 ڈگری فارن ہائیٹ تک پہنچ چکا تھا۔ ریکارڈ گرمی کے باعث کئی پریڈز اور تقریبات منسوخ کر دی گئیں تھیں۔
تقریب میں سفید فام قوم پرست تنظیم پیٹریاٹ فرنٹ کے ارکان بھی شامل تھے، جنہوں نے سوشل میڈیا پر اپنی موجودگی کی تصدیق کی۔ مقامی پولیس کے مطابق کسی قسم کے تشدد یا ناخوشگوار واقعے کی اطلاع نہیں ملی۔
رپورٹ کے مطابق ماضی میں امریکی صدور عام طور پر 4 جولائی کی تقریبات میں ذاتی طور پر شرکت سے گریز کرتے تھے، تاہم ٹرمپ نے سرکاری قومی تقریب اور انتخابی طرز کی سیاست کے درمیان فرق کو مزید دھندلا دیا ہے۔
نیشنل مال کے تقریباً ڈیڑھ میل طویل حصے کو گریٹ امریکن اسٹیٹ فیئر کے لیے مختص کیا گیا، جہاں مختلف اسٹالز اور نمائشیں شامل تھیں۔ دوسری جانب، ڈیموکریٹک پارٹی کے زیر انتظام کئی ریاستوں نے اپنی نمائندہ ٹیمیں بھیجنے سے انکار کیا۔
