شنگھائی(شِنہوا)چین کے مشرق میں لیگولینڈ شنگھائی ریزارٹ کے افتتاح نے ملک کے تیزی سے ترقی کرتے ہوئے تھیم پارک شعبے کو مزید تقویت دی ہے، جس سے چین کی بڑھتی ہوئی کھپت ، ترقی کی صلاحیت اور دنیا کے لئے کھلے پن کے عزم کی عکاسی ہوتی ہے۔
اس وقت دنیا کا سب سے بڑا لیگولینڈ اور چین کا پہلا ریزارٹ چینی شہریوں اور غیر ملکی سیاحوں کے لئے ایک نیا تفریحی مقام فراہم کرتا ہے۔ اس کا افتتاح موسم گرما کی تعطیلات کے آغاز پر ہوا ہے جو خصوصاً طلبہ کے لئے سیاحت اور خریداری کےعروج کا موسم ہوتا ہے۔
ثقافتی اور سیاحتی صنعتیں اب چین کی معیشت میں اہم ترقیاتی کردار ادا کر رہی ہیں کیونکہ ملک اب کھپت پر مبنی ترقی کی طرف بڑھ رہا ہے۔
سال کے آغاز میں چینی حکومت نے ملکی طلب بڑھانے اور صارفین کی سرگرمیوں کا فروغ اپنی اہم ترجیحات میں شامل کیا۔ اس نے ثقافتی کاروبار کی نئی اقسام کو فروغ دینے اور سیاحت کی صنعت کو بھرپور ترقی دینے پر زور دیا۔ ساتھ ہی حکام نے غیر ملکی سرمایہ کاروں کے لئے بہتر سہولیات اور تعاون کی یقین دہانی بھی کرائی تاکہ چین کو ان کے لئے ایک پسندیدہ منزل بنایا جا سکے۔
غیر ملکی سرمایہ سے قائم کردہ تھیم پارکس نے نہ صرف ان وعدوں کی تصدیق کی ہے بلکہ ان سے فائدہ بھی اٹھایا ہے۔ خاص طور پر شنگھائی ڈزنی ریزارٹ اور یونیورسل بیجنگ ریزارٹ نے شاندار کامیابی حاصل کی ہے۔
