ڈھاکہ (لارڈ میڈیا): بنگلا دیش کرکٹ ٹیم کے فاسٹ بولنگ کوچ شان ٹیٹ نے آسٹریلیا کے خلاف ملٹی فارمیٹ سیریز سے قبل اپنے عہدے سے استعفیٰ دے دیا ہے۔ بنگلا دیش کرکٹ بورڈ (بی سی بی) نے ان کی علیحدگی کی تصدیق کرتے ہوئے کہا کہ ٹیٹ نے ذاتی مصروفیات کی بنا پر استعفیٰ دیا ہے۔ بی سی بی کے آپریشنز چیئرمین شہریار نفیس نے بتایا کہ سابق فاسٹ بولر طلحہ جبیر کو عارضی طور پر نیا فاسٹ بولنگ کوچ مقرر کیا گیا ہے۔
بی سی بی کے مطابق شان ٹیٹ نے مختصر مدت کے ساتھ اپنی ذمہ داریاں جاری رکھنے کی خواہش ظاہر کی تھی، مگر باہمی مشاورت کے بعد یہ فیصلہ کیا گیا کہ ان کا عہدہ چھوڑ دینا ہی مناسب ہوگا۔ بورڈ نے کہا کہ یہ فیصلہ خوش اسلوبی اور باہمی اتفاقِ رائے سے کیا گیا ہے۔
شان ٹیٹ نے بنگلا دیش کے فاسٹ بولرز کی صلاحیتوں کو نکھارنے میں اہم کردار ادا کیا ہے، خصوصاً نوجوان پیسر ناہید رانا جنہوں نے حالیہ عرصے میں اپنی تیز رفتار بولنگ سے خاصی توجہ حاصل کی۔
سابق آسٹریلوی فاسٹ بولر نے اپنے استعفے کو ایک مشکل فیصلہ قرار دیتے ہوئے بنگلا دیشی کھلاڑیوں کی محنت، لگن اور پیشہ ورانہ رویے کی تعریف کی۔ اب طلحہ جبیر عارضی طور پر آسٹریلیا کے خلاف اہم سیریز میں بنگلا دیشی بولرز کی رہنمائی کریں گے۔
