کینیا کے شہر نیروبی میں چین-کینیا بزنس فورم کے موقع پر منعقدہ نمائش میں مقامی طور پر اگائے گئے ایووکاڈو کی نمائش کی جا رہی ہے۔(شِنہوا)
نیروبی (شِنہوا) کینیا کے وسطی کاؤنٹی مورانگا کے سرسبز و شاداب دیہی علاقے میں جیف نگیگی مبورو اپنے ہاس ایووکاڈو کے درختوں کے گھنے سایہ دار جھنڈ کو دوپہر کی ہوا کے ساتھ لہراتے ہوئے خوشی سے دیکھ رہا تھا۔
یہ نوجوان کسان قریبی دیہاتوں سے آئے مزدوروں سے گفتگو کرتے ہوئے لطف اندوز ہو رہا تھا جنہیں اس نے پکے ہوئے ایووکاڈو توڑنے کے لئے ملازم رکھا تھا تاکہ انہیں ایک کلیکشن سنٹر اور بعد ازاں کینیا کے دارالحکومت نیروبی کے مضافات میں قائم چینی ملکیتی ایووکاڈو آئل پروسیسنگ فیکٹری تک پہنچایا جا سکے۔
مبورو نے اپنے فارم پر شِنہوا کو بتایا کہ ماضی میں ہمیں کچھ مشکلات کا سامنا رہا ہے لیکن ایوکاڈو کا تیل تیار کرنے والے کارخانے ہماری مدد کو آئے ہیں جنہوں نے ہمیں ہمارے پھلوں کے لئے ایک مستقل مارکیٹ اور بہتر قیمتیں فراہم کی ہیں۔
وہ کینیا کے ایووکاڈو کے ان سینکڑوں چھوٹے کسانوں میں شامل ہیں جو اپنی پیداوار براہ راست سان مارک لمیٹڈ کو بیچتے ہیں۔ یہ ایووکاڈو کا تیل تیار کرنے والی ایک چینی ملکیتی کمپنی ہے جو نیروبی کے جنوب مشرقی صنعتی مرکز آتھی ریور ایکسپورٹ پروسیسنگ زون میں واقع ہے۔
سان مارک لمیٹڈ کی فیکٹری میں جاری گہما گہمی کے دوران آپریشنز منیجر محمد خان نے وقت نکال کر ان رس دار ایووکاڈو کو گاڑیوں سے اتارنے کے کام کی نگرانی کی جو حال ہی میں خام تیل نکالنے کے لئے وہاں پہنچائے گئے تھے۔
خان نے کہا کہ جب یہ پھل فیکٹری میں آتے ہیں تو ہم انہیں اس وقت تک محفوظ رکھتے ہیں جب تک وہ مطلوبہ حد تک پک نہ جائیں۔ اس کے بعد ایک چھانٹی کرنے والی ٹیم انہیں کرشنگ مشین تک لے جاتی ہے تاکہ خشک مادے اور پانی کو الگ کیا جا سکے۔
انہوں نے مزید کہا کہ اگلے مرحلے میں پھل سے پانی کو الگ کیا جاتا ہے جس کے بعد ایووکاڈو آئل کی پیکنگ کے آخری مرحلے کا آغاز ہوتا ہے۔
