ہاربن (شِنہوا) 10ویں چین-روس نمائش کے ہال میں موجود جراحی کرنے والے ایک چاندی رنگ کے ماڈل سرجیکل روبوٹ نے سیاحوں کی توجہ اپنی جانب مبذول کر رکھی ہے جہاں متعدد لوگ یہ جاننے کے لئے رک رہے ہیں کہ یہ مشین ریموٹ کنٹرول کے ذریعے خون کی نالیوں کی جراحی کیسے انجام دیتی ہے۔
روایتی طریقوں کے برعکس جہاں ڈاکٹروں کو سیسے کے بھاری ایپرن پہن کر کام کرنا پڑتا ہے اور وہ تابکاری کی زد میں آتے ہیں، یہ روبوٹ سرجنز کو دور بیٹھ کر آپریشن کرنے کی سہولت فراہم کرتا ہے جس سے نہ صرف تابکاری کا خطرہ کم ہوتا ہے بلکہ جراحی کی درستگی اور کارکردگی میں بھی اضافہ ہوتا ہے۔
بیجنگ وی اے ایس میڈیکل ٹیک کمپنی لمیٹڈ کے ایک عہدیدار چھن گوان بو نے بتایا کہ اس سال چین کے شمال مشرقی صوبے حئی لونگ جیانگ کے دارالحکومت ہاربن میں ایک ذیلی کمپنی قائم کرنے کے بعد ان کی کمپنی اس نمائش کو روسی مارکیٹ تک رسائی کے لئے استعمال کر رہی ہے۔
چھن نے کہا کہ اگرچہ اس بار ہم صرف مصنوعات کے ماڈل لائے ہیں لیکن ہمیں امید ہے کہ ہم چین-روس نمائش کے ذریعے روسی شراکت داروں کے ساتھ طبی شعبے میں تعاون بڑھائیں گے اور اعلیٰ معیار کے مقامی طبی آلات کے لئے بیرون ملک مارکیٹوں کو وسعت دیں گے۔
ایک اور بوتھ پر حئی لونگ جیانگ ہوئی دا ٹیکنالوجی کمپنی لمیٹڈ نے سمارٹ زرعی مشینری کی نمائش کی جس میں پھلوں کے باغات اور گرین ہاؤسز کے لئے خاص طور پر تیار کی گئی ایک بغیر ڈرائیور کے چلنے والی گاڑی بھی شامل ہے۔
ہوئی دا ٹیکنالوجی کے ڈپٹی جنرل منیجر چھو ہائی بو نے کہا کہ یہ کثیر المقاصد بغیر ڈرائیور کی مشین خود کار طریقے سے اپنا راستہ بنانے اور مختلف حصوں کی تبدیلی کے ذریعے بیک وقت کئی کام انجام دینے کی صلاحیت رکھتی ہے۔
