مراد آباد (لارڈ میڈیا) : بھارت کے شہر مراد آباد میں ایک حیران کن طبی واقعہ سامنے آیا، جہاں آمنہ نامی خاتون نے پانچ دن کے دوران چار بچوں کو جنم دیا۔ یہ واقعہ 9 مئی کو شروع ہوا جب آمنہ نے پہلے بچے کو جنم دیا، جبکہ باقی تین بچوں کی پیدائش 14 مئی کو ہوئی۔ ان میں دو بیٹے اور دو بیٹیاں شامل ہیں۔ حیران کن بات یہ ہے کہ تمام بچوں کی پیدائش نارمل ڈیلیوری کے ذریعے ہوئی، جبکہ عام طور پر اس نوعیت کے کیسز میں آپریشن کو ترجیح دی جاتی ہے۔
اسپتال انتظامیہ نے بتایا کہ خاتون کا حمل ابتدا ہی سے ’ہائی رسک‘ قرار دیا گیا تھا، تاہم ڈیلیوری کا یہ منفرد سلسلہ پانچ دن تک جاری رہا۔ ڈاکٹرز کے مطابق ماں اور چاروں نومولود اس وقت طبی نگرانی میں ہیں اور ان کی حالت مستحکم ہے۔
میڈیکل ٹیم کی قیادت ڈاکٹر شبھرا اگروال نے کی، جنہوں نے اسے اسپتال کی تاریخ کا غیر معمولی واقعہ قرار دیا۔ اس خبر کو سوشل میڈیا پر بھی زبردست توجہ حاصل ہوئی، جہاں صارفین نے اسے ’قدرت کا معجزہ‘ قرار دیا اور ڈاکٹروں اور ماں کی ہمت کو سراہا۔
یہ واقعہ ایسے وقت میں آیا ہے جب بھارت میں شرحِ پیدائش میں کمی پر مختلف پالیسیاں زیرِ بحث ہیں، اور حال ہی میں آندھرا پردیش حکومت کی جانب سے زیادہ بچوں کی پیدائش پر مالی انعامات کے اعلانات بھی خبروں میں رہے ہیں۔
