بیجنگ (شِنہوا) چین میں یوم مئی کی تعطیلات کے دوران سرحد پار سفر میں نمایاں اضافہ متوقع ہے اور مسافروں کی یومیہ آمد و رفت اوسطاً 22 لاکھ 50 ہزار تک پہنچنے کی توقع ہے جبکہ ایک دن میں یہ تعداد 24 لاکھ سے بھی تجاوز کر سکتی ہے۔
قومی امیگریشن انتظامیہ (این آئی اے) نے منگل کو بتایا کہ یکم مئی سے شروع ہونے والی پانچ روزہ تعطیلات سال کے مصروف ترین سفری ادوار میں سے ایک ہیں، جن کی بنیادی وجہ سیاحت اور اہل خانہ سے ملاقاتوں کی بڑھتی ہوئی طلب ہے۔
بڑے بین الاقوامی ہوائی اڈوں پر مسافروں کی آمدورفت میں واضح اضافہ متوقع ہے۔ این آئی اے کے مطابق شنگھائی پوڈونگ بین الاقوامی ہوائی اڈے پر مسافروں کی یومیہ سرحد پار آمدورفت اوسطاً تقریباً ایک لاکھ 2 ہزار جبکہ گوانگ ژو بائیون بین الاقوامی ہوائی اڈے پر 55 ہزار رہنے کی توقع ہے۔
چین کے جنوبی ہانگ کانگ اور مکاؤ سے ملحقہ زمینی سرحدی گزرگاہوں پر بھی رش رہنے کا امکان ہے۔ اندازے کے مطابق شین ژین کے لوہو پورٹ پر روزانہ تقریباً 2 لاکھ 30 ہزار مسافروں جبکہ ژوہائی کے گونگ بے پورٹ اور ہانگ کانگ-ژوہائی-مکاؤ پل پورٹ پر بالترتیب تقریباً 3 لاکھ 96 ہزار اور ایک لاکھ 29 ہزار مسافروں کی یومیہ آمدورفت متوقع ہے۔
حکام کا کہنا ہے کہ مصروف سفری مدت کے دوران سرحدی آمدورفت کو ہموار اور منظم رکھنے کے لئے عملے میں اضافہ اور ٹریفک انتظام کے موثر اقدامات کئے جائیں گے۔
