کونمنگ (شِنہوا) چین-لاؤس ریلوے نے سرحد پار مال برداری کے تجارتی حجم میں زبردست اضافہ ریکارڈ کیا ہے جس کی پہلی سہ ماہی کی مالیت سالانہ بنیاد پر 62.7 فیصد بڑھ کر 6.81 ارب یوآن (تقریباً 99 کروڑ 20 لاکھ امریکی ڈالر) ہو گئی جو اس مدت کے لئے ایک نیا ریکارڈ ہے۔
جنوب مغربی چین کے صوبے یون نان میں کونمنگ کسٹمز کے مطابق جنوری سے مارچ تک فوٹو وولٹک مصنوعات کی برآمدات سالانہ بنیاد پر 43.2 گنا بڑھ کر 1.19 ارب یوآن تک پہنچ گئیں جبکہ تازہ اور خشک پھلوں کی درآمدات دوگنا بڑھ کر 50 کروڑ یوآن تک پہنچ گئیں۔
کسٹمز نے کہا کہ ریلوے "چینی مصنوعات کو جنوب کی طرف اور جنوب مشرقی ایشیا کی خاص مصنوعات کو شمال کی طرف لے جانے” کے لئے ایک موثر دو طرفہ راہداری کے طور پر ابھرتی جا رہی ہے۔
اپنے آغاز کے بعد سے اب تک اس ریلوے کے ذریعے درآمدات اور برآمدات کی مجموعی مالیت 80 ارب یوآن سے تجاوز کر چکی ہے۔
یہ ریلوے اب چین بھر کے 6 ہزار سے زائد اداروں کو خدمات فراہم کر رہا ہے اور اس کا تجارتی اثر لاؤس اور تھائی لینڈ سمیت 19 ممالک اور خطوں تک پہنچ چکا ہے۔ تجارتی اشیاء کی تعداد ریلوے کے آغاز میں تقریباً 500 اقسام سے بڑھ کر اب 3 ہزار 800 سے زیادہ ہو گئی ہے۔
کونمنگ کسٹمز نے ریلوے کے ساتھ سرحدی تجارت کو آسان بنانے کے لئے متعدد اقدامات متعارف کرائے ہیں۔
چین-لاؤس ریلوے اعلیٰ معیار کے بیلٹ اینڈ روڈ تعاون کا ایک اہم منصوبہ ہے جس کا کام دسمبر 2021 میں شروع ہوا۔ یہ ایک ہزار 35 کلومیٹر طویل ریلوے چین کے کونمنگ کو لاؤس کے وینتیان سے جوڑتا ہے۔
