گوانگ ژو (شِنہوا) چین کے جنوبی ہانگ کانگ-ژوہائی-مکاؤ پل نے اپنے افتتاح کے بعد سے اب تک گاڑیوں کی سب سے زیادہ یومیہ سرحد پار آمد و رفت ریکارڈ کی ہے۔ ژوہائی امیگریشن اتھارٹی کے ماتحت پل کے بارڈر انسپکشن سٹیشن کے مطابق پیر کے روز 29 ہزار800 گاڑیوں کی جانچ پڑتال کی گئی۔
اس تعداد میں 28 ہزار 400 مسافر گاڑیاں شامل تھیں، جن میں سے 22 ہزار 800 گاڑیاں ہانگ کانگ یا مکاؤ کے سنگل پلیٹ نمبر کی حامل تھیں اور یہ دونوں اعداد و شمار ایک دن کے نئے ریکارڈ ہیں۔
4 سے 6 اپریل تک جاری رہنے والی 3 روزہ چھنگ منگ تہوار کی تعطیلات کے دوران اس پل کے ژوہائی ہائی وے پورٹ سے 77 ہزار 400 سے زائد گاڑیاں گزریں۔ ان میں ہانگ کانگ اور مکاؤ کی سنگل پلیٹ گاڑیوں کا تناسب 72.8 فیصد سے زیادہ رہا جو کہ 56 ہزار 400 گاڑیوں پر مشتمل ہے۔
پل کے بارڈر انسپکشن سٹیشن کے ایک اہلکار نے کہا کہ اعداد و شمار سے ظاہر ہوتا ہے کہ ہانگ کانگ اور مکاؤ کے رہائشیوں کی جانب سے مین لینڈ تک ذاتی گاڑیوں کے ذریعے سفر ایک مستحکم رجحان بن چکا ہے اور سرحد پار ٹریفک کا بڑا حصہ یہی ہے۔
