لیبیا کے مسلح افواج کے سربراہ جنرل محمد علی احمد الحداد کے طیارہ حادثہ سے متعلق اہم پیشرفت سامنے آئی ہے اور ترکی کے حکام نے طیارے کا بلیک باکس اور کاک پٹ وائس ریکارڈر برآمد کر لیا ہے۔
ترک حکام کے مطابق فالکن 50 نجی طیارہ منگل کے روز ترکی کے دارالحکومت انقرہ سے طرابلس واپس روانہ ہوا تھا تاہم اڑان بھرنے کے چند منٹ بعد طیارے میں بجلی کے نظام میں خرابی پیدا ہوئی اور ایمرجنسی لینڈنگ کی درخواست کے کچھ دیر بعد طیارے سے رابطہ منقطع ہو گیا، ترک وزیر داخلہ علی یرلی کایا نے حادثہ کی جگہ پر میڈیا کو بتایا کہ فلائٹ ڈیٹا ریکارڈر اور وائس ریکارڈر برآمد کر لئے گئے ہیں اور انکی جانچ کا عمل شروع کر دیا گیا ہے، وزیر ٹرانسپورٹ کے مطابق حادثہ کی وجوہات جاننے کیلئے بلیک باکس کا تجزیہ کسی غیر جانبدار ملک میں کیا جائیگا اور نتائج مکمل شفافیت کیساتھ دنیا کے سامنے رکھے جائیں گے۔
ترک حکام کے مطابق جائے حادثہ پر امدادی کارروائیاں جاری ہیں جہاں سینکڑوں اہلکار، ریسکیو ٹیمیں سرگرم عمل ہیں اور ڈرونز کے ذریعے نگرانی کی جا رہی ہے۔
انقرہ کے پراسیکیوٹر آفس نے حادثے کی تحقیقات بھی شروع کر دی ہیں، ماہرین کا کہنا ہے کہ بلیک باکس سے حاصل ہونیوالا ڈیٹا حادثے کی اصل وجہ واضح کریگا تاہم اس عمل میں کئی ماہ لگ سکتے ہیں۔
