نائب وزیراعظم اور وزیر خارجہ سینیٹر محمد اسحاق ڈار شنگھائی تعاون تنظیم کے سربراہان حکومت کے کونسل کے اجلاس میں شرکت کیلئے ماسکو روانہ ہو گئے ہیں۔
دفتر خارجہ کے مطابق انہیں اس دورے کی دعوت روس کے وزیرِاعظم میخائل میشوستن نے دی، نائب وزیراعظم و وزیر خارجہ 17 تا 18 نومبر 2025 کو روس کے دارالحکومت ماسکو میں منعقد ہونیوالے اجلاس میں پاکستان کے وفد کی قیادت کرینگے، اجلاس میں بیلاروس، چین، قازقستان، کرغزستان، روس، تاجکستان اور ازبکستان کے سربراہانِ حکومت، ایران کے نائب صدر، اور پاکستان و بھارت کے وزرائے خارجہ شریک ہونگے۔
ایس سی او کے رکن ممالک کے علاوہ، منگولیا، بحرین، مصر، قطر، کویت اور ترکمانستان کے سربراہانِ حکومت، نیز دولتِ مشترکہ برائے آزاد ریاستیں، یوریشین اکنامک یونین، کلیکٹیو سکیورٹی ٹریٹی آرگنائزیشن اور ڈیموکریٹک سوشلسٹس آف امریکا سمیت بین الاقوامی و علاقائی تنظیموں کے سربراہان بھی اجلاس میں شرکت کرینگے۔
نائب وزیرِ اعظم اپنے خطاب میں اہم علاقائی و عالمی امور پر پاکستان کا مقف پیش کرینگے اور ایس سی او خطے کے فائدے کیلئے تنظیم کو مزید مضبوط بنانے کے طریقوں پر روشنی ڈالیں گے۔
اسحاق ڈار اجلاس کے موقع پر دیگر ایس سی او ممالک کی قیادت کیساتھ دوطرفہ ملاقاتیں بھی کریں گے۔
