لاہور: وزیراعلی پنجاب مریم نواز نے کہا ہے کہ پنجاب برطانیہ کیساتھ اشتراک کار کو مزید وسعت دینے ،تعاون کے فروغ کے نئے مواقع تلاش کرنے کیلئے پرعزم ہے،17لاکھ برٹش پاکستانی برادری کی بڑی تعداد کا تعلق پنجاب سے ہونا باہمی پائیدار رشتے کی عملی مثال ہے۔
بدھ کو وزیراعلی پنجاب سے برطانوی ہائی کمشنر جین میریٹ نے ملاقات کی ہے جس میں باہمی دلچسپی کے امور، دوطرفہ تعاون، تعلیم، سرمایہ کاری، ماحولیاتی تحفظ اور گورننس میں شراکت داری کو مزید فروغ دینے پر تبادلہ خیال بھی کیا گیا۔
مریم نواز شریف نے سبکدوش برطانوی ہائی کمیشن کی سیاسی مشیر زوئی ویئر کو شاندار خراجِ تحسین پیش کرتے ہوئے سفارتی خدمات کو سراہا۔وزیراعلی مریم نواز نے تعلیم، تجارت، سرمایہ کاری، موسمیاتی تحفظ اور گورننس کے شعبوں میں باہمی اشتراک کار مزید بڑھانے کی پیشکش کی۔
اس موقع پر گفتگو کرتے ہوئے مریم نواز نے کہا کہ برطانوی سیاسی مشیر نے اپنے منصب پر دیانت، محنت اور شراکت داری کے جذبے کے ساتھ فرائض انجام دیئے، زوئی ویئر کا ارتھ شاٹ پرائز جیسے عالمی ماحولیاتی منصوبے میں کردار قابل تحسین ہے، وہ پنجاب میں ہمیشہ دوستوں کی طرح یاد رکھی جائیں گی۔
انہوں نے کہا کہ جین میریٹ کی بطور ہائی کمشنر خدمات کو حکومت پنجاب انتہائی قدر کی نگاہ سے دیکھتی ہے، جین میریٹ کا عالمی سفارتی تجربہ پاکستان اور برطانیہ کے تعلقات کو ایک نئی بلندی پر لے جانے کی نوید ہے۔
انہوں نے کہا کہ 17لاکھ پر مشتمل برٹش پاکستانی برادری کی بڑی تعداد کا تعلق پنجاب سے ہونا باہمی پائیدار رشتے کی عملی مثال ہے۔ انہوں نے کہا کہ پنجاب برطانیہ کے ساتھ اشتراک کار کو مزید وسعت دینے اور تعاون کے فروغ کے نئے مواقع تلاش کرنے کیلئے پرعزم ہے۔
