اسلام آباد: صدر آصف زرداری نے آپریشن بنیان مرصوص کی کامیابی کو مسلح افواج کیساتھ غیرتمند ،باوقار قوم کی فتح قرار دیتے ہوئے واضح کیا ہے کہ پاکستان آبی حقوق کے تحفظ کیلئے قومی طاقت کے تمام ذرائع بروئے کار لائے گا، دنیا نے ہمارے صبر و تحمل کا اعتراف ،آپریشنل مہارت کو تسلیم کیا،اپنی خود مختاری، جغرافیائی سالمیت پر سمجھوتا نہیں کرینگے ،کسی بھی جارحیت کا بھرپور جواب دیا جائے گا۔
بھارتی جارحیت کے خلاف پاکستان کی شاندار کامیابی بارے یوم تشکر کے موقع پر اپنے بیان میں صدر زرداری نے کہا کہ آپریشن بنیان مرصوص کی کامیابی پر مسلح افواج کے دلیر سپاہیوں اور سربراہان کو خراجِ تحسین پیش کرتا ہوں، یہ کامیابی صرف پاکستانی افواج کی نہیں بلکہ پوری قوم کی کامیابی ہے، قوم دشمن کی جارحیت کے خلاف بنیان مرصوص کی مانند کھڑی رہی۔
انہوں نے کہا کہ مسلح افواج نے بھارتی اشتعال انگیزی کا پیشہ ورانہ انداز میں بھربور قوت سے جواب دیا، دنیا نے پاکستان کے صبر و تحمل کا اعتراف کیا اور ہماری آپریشنل مہارت کو تسلیم کیا۔انہوں نے کہا کہ پاکستان پرامن ملک ہے، ہم کسی کے خلاف جارحانہ عزائم نہیں رکھتے، تاہم پاکستان اپنی خود مختاری، جغرافیائی سالمیت پر سمجھوتا نہیں کرے گا، ہماری سرزمین کے خلاف کسی بھی جارحیت کا بھرپور جواب دیا جائے گا۔ انہوں نے کہا کہ سندھ طاس معاہدے کی یکطرفہ معطلی کو مسترد کرتے ہیں، معاہدے میں یکطرفہ معطلی کی کوئی شق موجود نہیں ہے، پاکستان اپنے آبی حقوق کے تحفظ کے لیے قومی طاقت کے تمام ذرائع بروئے کار لائے گا۔صدر زرداری نے کہا کہ ان بہادر سپاہیوں کو سلام جنہوں نے جانوں کا نذرانہ دے کر وطن عزیز کا دفاع کیا۔ میں بطور صدر یہ اعادہ کرتا ہوں کہ ہم ہمیشہ اپنی افواج کے شانہ بشانہ رہیں گے۔
