پشاور: مشیر اطلاعات خیبر پختونخوا حکومت بیرسٹر سیف نے کہا ہے کہ مشرقی سرحد پر دشمن کا غرور خاک میں ملا دیا اب مغربی سرحد پر بی ٹیم دہشت گردوں کو بھی شکست دیں گے۔جاری بیان میں بیرسٹر سیف نے کہا کہ بھارت خیبر پختونخوا میں دہشت گردوں کی پشت پناہی میں ملوث ہے تاہم صوبائی پولیس سمیت تمام سیکیورٹی ادارے بھارت کی اے اور بی ٹیموں کے خلاف متحد ہیں۔
انہوں نے کہا کہ پاک فوج نے مشرقی سرحد پر بھارت کو منہ توڑ جواب دے کر غرور خاک میں ملا دیا ہے، اب مغربی سرحد پر بھارت کی بی ٹیم دہشت گردوں کو بھی شکست دیں گے۔ انہوں نے کہا کہ امن دشمن عناصر سے آہنی ہاتھوں سے نمٹا جائے گا ،خیبر پختونخوا پولیس دہشت گردوں کا ڈٹ کر مقابلہ کر رہی ہے،دہشت گردی کیخلاف پولیس اہلکاروں کی قربانیاں ہرگز رائیگاں نہیں جائیں گی۔
انہوں نے کہا کہ بھارت کی بی ٹیم کو سر اٹھانے نہیں دیا جائے گا۔بیرسٹر سیف نے کہا کہ گزشتہ روز پشاور میں پولیس اہلکاروں کو نشانہ بنایا گیا ،خیبر پختونخوا حکومت دھماکے میں شہید اہلکاروں کے لواحقین کے غم میں برابر کی شریک ہے، واقعے میں ملوث ملزمان کو کیفر کردار تک پہنچائیں گے ۔
