نیو یارک: اقوام متحدہ میں مستقل پاکستانی مندوب عاصم افتخار نے نئی دہلی کی اشتعال انگیز پالیسیوںکو جنوبی ایشیا کے امن کیلئے خطرہ قرار دیتے ہوئے کہا ہے کہ بھارت سیاسی مقاصد کیلئے خطرناک بیانیہ اپنانے کے ساتھ علاقائی استحکام کو بھی دائو پر لگا رہا ہے۔
اقوام متحدہ میں پاکستان کے مستقل مندوب عاصم افتخار نے یو این سیکرٹری جنرل انتونیو گوتیریس سے ملاقات کی جس میں جنوبی ایشیا کی حالیہ کشیدہ صورت حال اور ممکنہ اثرات پر تفصیلی بات چیت کی گئی، پاکستانی مندوب نے زور دیا کہ اسلام آباد خطے میں امن و استحکام کے قیام کیلئے پرعزم ہے اور ہر ممکن سفارتی کوشش جاری رکھے گا۔گفتگو میں کشیدگی کے خاتمے ،مسائل کے پرامن حل کی ضرورت پر اتفاق کیا گیا۔
عاصم افتخار نے بھارتی جارحانہ رویے کو تنقید کا نشانہ بناتے ہوئے کہا کہ نئی دہلی کی اشتعال انگیز پالیسیاں جنوبی ایشیا کے امن کیلئے خطرناک صورت اختیار کر چکی ہیں۔انہوں نے کہا کہ بھارت سیاسی مقاصد کیلئے خطرناک بیانیہ اپنانے کے ساتھ علاقائی استحکام کو بھی دائو پر لگا رہا ہے۔
