اسلام آباد: وفاقی وزیر داخلہ محسن نقوی نے اقوام متحدہ کو نیشنل پولیس اکیڈمی میں امن مشنز کیلئے ریجنل کورسز کرانے کی پیشکش کرتے ہوئے کہا کہ نیشنل پولیس اکیڈمی کی عالمی معیار کے مطابق مکمل تنظیم نو جا ری ہے، ادارہ میں پولیس افسران کی تربیت و استعداد کار بڑھانے کیلئے تمام جدید و معیاری سہولتوں کی فراہمی یقینی بنائی جارہی ہے ،پاکستان ہمیشہ اقوام متحدہ کے امن مشنز کا بھرپور حامی رہا ہے، عالمی امن کیلئے اپنا بھر پور کردار جاری رکھیں گے۔
جاری بیان کے مطابق ہفتے کو وزیرداخلہ محسن نقوی سے اقوامِ متحدہ کے انڈر سیکرٹری جنرل برائے امن مشنز جنرل جین پیر لاکروا نے ملاقات کی۔ اس موقع پر وزیر مملکت داخلہ طلال چودھری، سیکرٹری داخلہ محمد خرم آغا اور اقوام متحدہ کے سیکرٹری جنرل کے ایڈوائزر فیصل شاہکار بھی موجود تھے۔
ملاقات میں پاکستان اور اقوام متحدہ کے امن مشنز کے مابین تعاون بڑھانے پر تبادلہ خیال کیا گیا۔ وزیر داخلہ نے کہا کہ پاکستان ہمیشہ اقوام متحدہ کے امن مشنز کا بھرپور حامی رہا ہے، عالمی امن کیلئے اپنا بھر پور کردار جاری رکھیں گے۔
انہوں نے بتایا کہ پاکستانی فوج اور پولیس افسران نے کئی امن مشنز میں بھر پور مہارت سے کامیاب کردار ادا کیا ہے، کئی برس بعد پاکستانی پولیس افسران یواین میں دوبارہ فرائض سرانجام دینا شروع کر رہے ہیں۔ انہوں نے کہا کہ اس وقت پاکستانی افسران مختلف امن مشنز میں خدمات سرانجام دے رہے ہیں، ہم آئندہ بھی اقوام متحدہ کے امن مشنز کیلئے ہر ممکن معاونت فراہم کریں گے۔ انہوں نے کہا کہ اقوام متحدہ پولیس کی سربراہی پاکستانی پولیس سروس کے افسر کے کرنے پر فخر ہے۔
وزیر داخلہ نے اقوام متحدہ کے امن مشنز کو موثر بنانے کیلئے جدید ٹیکنالوجی کے استعمال کی ضرورت پر زور دیا ۔ وزیرداخلہ نے یو این کو نیشنل پولیس اکیڈمی میں امن مشنز کیلئے ریجنل کورسز کرانے کی پیشکش کرتے ہوئے کہا کہ نیشنل پولیس اکیڈمی کی بین الاقوامی معیار کے مطابق مکمل تنظیم نو کی جا رہی ہے، ادارہ میں پولیس افسران کی تربیت و استعداد کار بڑھانے کیلئے تمام جدید و معیاری سہولتوں کی فراہمی کو یقینی بنایا جا رہا ہے جبکہ اقوام متحدہ کی جینڈر پالیسی کے تحت خواتین کو پاکستان کی پولیس سروس میں یکساں مواقع فراہم کئے جا رہے ہیں۔
اس موقع پر انڈر سیکرٹری جنرل برائے امن مشنز جنرل جین پیر لاکروا نے پاکستانی پولیس افسران کی یو این میں دوبارہ بحالی پر محسن نقوی کی ذاتی کاوشوں کو سراہتے ہوئے کہا کہ اقوام متحدہ امن مشنز مشکل حالات میں بھی امن کیلئے برسر پیکار ہیں۔
