اسلام آباد: وفاقی وزیر خزانہ سینیٹر محمد اورنگزیب نے کہا ہے کہ نجکاری عمل کو تیز کرنے کیلئے پرعزم ہیں،24سرکاری ادارے نجکاری فہرست میں شامل کئے جاچکے، معیشت کے استحکام نے مارکیٹ کو نئی زندگی بخشی ،ترقی کی نئی راہیں کھولی ،امید ہے الویریز اینڈ مارسل کیساتھ شراکت داری پاکستان اور معیشت کیلئے خوشحال مستقبل کی بنیاد رکھے گی۔
جاری بیان کے مطابق بدھ کو وزیر خزانہ سینیٹر محمد اورنگزیب سے عالمی پیشہ ورانہ خدمات فراہم کرنیوالی فرم الویریز اینڈ مارسل کے وفد نے پیٹر بریگز( ڈویژن ایگزیکٹو )کی قیادت میں ملاقات کی ۔وفد میں عبداللہ الابعاری منیجنگ ڈائریکٹر اور رضا باقر گلوبل ہیڈ آف سوورین ایڈوائزری موجود تھے۔
ملاقات میں پیٹر بریگز نے پاکستان میں سرمایہ کاری کیلئے الویریز اینڈ مارسل کے مضبوط عزم کا اظہار کرتے ہوئے خطے کی ابھرتی منڈیوں میں کمپنی کی طویل المدتی حکمت عملی کو اجاگر کیا۔انہوں نے کہا کہ پاکستان کی ابھرتی ہوئی مارکیٹ سرمایہ کاری اور طویل مدتی ترقی کیلئے بے پناہ مواقع فراہم کرتی ہے،کمپنی پاکستان میں اپنا دفتر کھولنے پر غور کر رہی ہے تاکہ حکومت کو نجکاری عمل میں مدد فراہم کی جا سکے اور عالمی سرمایہ کاروں کو ملک میں سرمایہ کاری کی جانب راغب کیا جا سکے۔
اس موقع پر سینیٹر محمد اورنگزیب نے الویریز اینڈ مارسل کی دلچسپی کا خیرمقدم کرتے ہوئے نجکاری اور سوورین ایڈوائزری میں کمپنی کی مہارت ،ملک میں سرمایہ کاری کے مواقع کو موثر انداز میں کھولنے کیلئے ممکنہ کردار کو سراہا۔
انہوں نے کہا کہ امید ہے الویریز اینڈ مارسل کیساتھ شراکت داری پاکستان اور معیشت کیلئے خوشحال مستقبل کی بنیاد رکھے گی۔وزیر خزانہ نے کہا کہ حکومت کا وژن وزیراعظم کے اہداف کے عین مطابق ہے جس کا مقصد پاکستان میں تجارت، سرمایہ کاری ،سیاحت کو فروغ دینا اور خطے میں ابھرتے ہوئے اقتصادی کوریڈور سے بھرپور استفادہ حاصل کرنا ہے۔
انہوں نے کہا کہ حکومت نجکاری عمل کو تیز کرنے کیلئے پرعزم ہے ،اب تک 24سرکاری اداروں کو نجکاری کی فہرست میں شامل کیا جا چکا ہے۔وزیر خزانہ نے گزشتہ 14ماہ کے دوران پاکستانی معیشت میں ہونیوالی بہتری کا ذکر کرتے ہوئے کہا کہ معیشت کے استحکام نے مارکیٹ کو نئی زندگی بخشی ہے اور ترقی کی نئی راہیں کھولی ہیں۔
انہوں نے عالمی شپنگ کمپنی اے پی مولر میرکس کی جانب سے میری ٹائم سیکٹر میں بڑی سرمایہ کاری کے حالیہ اعلان کا حوالہ دیتے ہوئے کہا کہ مقامی سرمایہ کار اور کاروباری حضرات بھی نئے جوش و جذبے سے ان مواقع سے فائدہ اٹھانے کیلئے آگے آ رہے ہیں۔وزیر خزانہ نے کہا کہ یہ سب معاشی بہتری کی واضح علامتیں اور ملکی ترقی کیلئے امید افزاء اشارے ہیں۔
