اسلام آباد: آئی ایم ایف نے کہا ہے کہ پاکستان نے حکومتی قرضوں کو کم کرنے کیلئے سخت معاشی اقدامات کئے ہیں ،مہنگائی میں کمی کیلئے سخت مانیٹری پالیسی اپنائی گئی جبکہ بجلی کی پیداواری لاگت کم کرنے کیلئے بھی اصلاحات کی گئی ہیں،پاکستان کو موسمیاتی تبدیلیوں سے نمٹنے کیلئے ممکنہ طور پر فنڈز فراہم کئے جا سکتے۔
آئی ایم ایف کی جانب سے پاکستان سے مذاکرات بارے جاری اعلامئے میں کہا گیا ہے کہ پاکستان کے ساتھ 7ارب ڈالرز قرض پروگرام پر جائزے کیلئے بات چیت ہوئی ہے، پاکستان نے موجودہ قرض پروگرام پر سختی سے عمل درآمد کیا ہے۔
بیان میںکہا گیا ہے کہ پاکستان کے ساتھ کلائمیٹ فنانسنگ کیلئے اور قرضوں کی ادائیگی کی مینجمنٹ ،توانائی شعبے میں لاگت کم کرنے، بہتری، صحت عامہ کی بہتری، تعلیم کے فروغ، سماجی تحفظ اور معاشی ترقی کی شرح بڑھانے پر بھی گفتگو ہوئی ہے۔
اعلامئے میںکہا گیا ہے کہ پاکستان کیساتھ موسمیاتی تبدیلیوں کے اثرات کم کرنے پر بھی تبادلہ خیال ہوا اس حوالے سے آن لائن مزید بات چیت جاری رہے گی۔ اعلامئے میں کہا گیا ہے کہ پاکستان کیساتھ بات چیت مثبت رہی۔ دونوں نے سٹاف لیول معاہدے کیلئے نمایاں پیشرفت کی ہے، پاکستان نے قرض پروگرام کی شرائط پر سختی سے عمل درآمد کیا ہے،حکومتی قرضوں کو کم کرنے کیلئے سخت معاشی اقدامات کئے گئے ہیں جبکہ مہنگائی کم کرنے کیلئے سخت مانیٹری پالیسی اپنائی گئی اور بجلی کی پیداواری لاگت کم کرنے کیلئے بھی اصلاحات کی گئی ہیں۔
اعلامئے میں کہا گیا ہے کہ پاکستان نے معاشی شرح نمو بڑھانے کیلئے اصلاحاتی ایجنڈے پر عملدرآمد کیا ہے، کلائمیٹ ریفارمز ایجنڈے پر بھی بات چیت کی گئی ہے ۔ بیان میں کہا گیا ہے کہ پاکستان کو موسمیاتی تبدیلیوں سے نمٹنے کیلئے ممکنہ طور پر فنڈز فراہم کئے جا سکتے ہیں، پاکستان اور آئی ایم ایف مذاکرات کو حتمی شکل دینے کے لئے ورچوئلی بات چیت جاری رکھیں گے۔
